Otandyq telearnalarda «Kólikter 2» mýltfılmi kórsetiledi

«Kólikter 2» (2011j.) - eń alǵashqy bolyp qazaq tiline aýdarylǵan gollıvýdtyq mýltfılm. Álemdegi 7 myńnan astam tildiń ishinde qazaq tili Walt Disney stýdııasy resmı dýblıaj jasaǵan 39-shy til bolyp otyr. Sondaı-aq, túrik tilinen keıingi ekinshi túrki tili dep te aıtýǵa bolady.

Bolashaqtyqtar dýblıajdyń mátinin aýdarýǵa tikeleı aralasyp, aǵylshyn tilinen týra aýdardy. Qazaq kórermenine mýltfılmniń aıtar oıyn týra jetkizý úshin jáne az sózge kóp maǵyna syıǵyzý maqsatynda qazaqtyń maqal-mátelderi men ázil-qaljyńdary saýatty túrde qoldanyldy. Rochester Tehnologııa ınstıtýtynyń túlegi, aǵylshyn jáne qazaq tilderin erkin meńgergen Dastan Aspan aýdarmanyń basy-qasynda júrdi.

Dýblıaj jasaý kezinde 40 shaqty adamnyń daýystary tekserildi. Jazý protsesi Almaty qalasyndaǵy «Sınema Ton Prodakshn» stýdııasynda júzege asyrylsa, aqyrǵy montaj Londondaǵy «Shepperton» stýdııasynda júzege asty.

Bes basty keıipkerdi dybystaıtyn ártister Los-Andjeleste bekitildi. Bir daýysty bekitý úshin fılm rejısseri kem degende 5-6 daýys usynýy tıis boldy. Basqa keıipkerlerdiń daýystary Almaty qalasynda «Ýolt Dısneı Kompanı TMD» kompanııasynyń Disney Character Voices bóliminiń qyzmetkerleriniń qatysýymen bekitildi. «Kólikter 2» mýltfılminiń keıipkerlerin qazaqsha dybystaǵandardyń qatarynda Baqytjan Álpeıisov, Kúnsulý Shaıahmetova, Dáýlet Ábdiǵaparov, Nyshanbek Jubanaev jáne Azamat Qanapııaev bar. Mýltfılmdi shyǵarýshylarǵa Qanapııaev dybystaǵan Metr erekshe unapty. «Biz estip kórgen Metrlerdiń eń úzdikteriniń biri», - dedi olar. «Biz osy premerany 5 jyl kútemiz degenshe, mýltfılmniń keıipkerleri qazaq tilin jetik meńgerip aldy», - dep qaljyńdady Vadım Golenko.

«Kólikter 2» - «Bolashaq» Qaýymdastyǵy, «Meloman» kompanııasy, «Altyn Qyran» halyqaralyq qaıyrymdylyq qorynyń Qazaqstan Respýblıkasy Táýelsizdiginiń 20 jyldyǵyna arnaǵan tartýy.