Otandyq telearnalar men baǵdarlamalardyń reıtıngileri live-rejımge shyǵarylady

NUR-SULTAN. QazAqparat –QR Aqparat jáne qoǵamdyq damý mınıstrligi otandyq telearnalar men baǵdarlamalardyń reıtıngilerin live-rejımge shyǵarady. Bul týraly vedomstvo basshysy Aıda Balaeva málim etti, habarlaıdy QazAqparat tilshisi.

«Qazir ınternet saıttar – ámbebap habar taratý quralyna aınalǵanyn kórip otyrmyz. Búginde bir saıttyń ishinen jazba aqparatty da, aýdıo habarlamany da, beıne-baǵdarlamalardy da tabýǵa bolady. Mysaly búginde memlekettik qoldaýǵa ıe e-history.kz, adebiportal.kz, el.kz, inform.kz, baq.kz sııaqty saıttarda qazaq tilindegi materıaldar zamanaýı formattaǵy beıne jazbalar, aýdıopodkastar oqyrmandarǵa qoljetimdi. Búginde jastar arasyndaǵy eń suranysqa ıe qosymshalardyń biri – «TikTok» áleýmettik jelisi. Bul rette, e-history.kz portaly «Tıktoker tarıhshy» paraqshasyn ashyp, jastarǵa jeńil ári qysqa túrde elimizdiń tarıhyn túsindiretin aqparat beredi», - dedi Aıda Balaeva Qazaq tilinde kontent jasaýshylardyń dástúrli forýmynda.

Mınıstr osy aıdan bastap otandyq telearnalardyń reıtıngi onlaın rejımge shyǵarylatynyn jetkizdi.

«Buǵan deıin qoǵam tarapynan medıa ólsheý júıesin jetildirý týraly usynystar aıtylǵan bolatyn. Osy oraıda, biz osy aıdan bastap mınıstrliktiń saıtynda zamanaýı IP tehnologııalardy paıdalana otyryp, jańa júıeni iske qostyq. Onyń negizinde, qyzyǵýshylyq tanytqan kez kelgen azamat barlyq qazaqstandyq telearnalar men baǵdarlamalardyń reıtıngilerin live-rejımde kóre alady. Qazir otandyq kontentti qaraýshylar úlesi úlken qarqynmen ósip keledi. Búginde Qazaqstan medıa naryǵyndaǵy shet eldik jáne otandyq arnalar reıtıngisinde úzdik TOP-10-dyqty bizdiń otandyq telearnalar ıelendi. Munyń ózi bizdiń ulttyq teleónimderdiń básekege qabiletiniń jyldan-jylǵa artyp kele jatqanyn kórsetedi», - dedi mınıstr.