Otandyq táýelsiz aýdıtorlar kásibı keńestiń qurylýyna qarsy

NUR-SULTAN. QazAqparat – Qazaqstandyq táýelsiz aýdıtorlar «Aýdıtorlyq qyzmet týraly» QR Zańyna engizilgen túzetýlerge alańdaýshylyq tanytyp, aýdıtorlyq qyzmet boıynsha kásibı keńestiń qurylýyna qarsylyq bildirip otyr, dep habarlaıdy QazAqparat tilshisi.

Ótken jyly 6 shildede «Aýdıtorlyq qyzmet týraly» QR Zańyna engizilgen túzetýler kúshine endi.

Túzetýlerdiń negizgi ıdeıasy — Qazaqstanda aýdıtorlyq qyzmet boıynsha kásibı keńes qurý.

Táýelsiz aýdıtorlardyń málimdeýinshe, zańǵa engizilgen ózgeristerden keıin elimizdegi aýdıtorlyq uıymdardyń 76%-y óz qyzmetin toqtatý qaýpi bar.

«Aýdıtorlyq qyzmet týraly zańǵa engizilgen túzetýde básekelestik orta qurý jáne aýdıt salasyndaǵy kásibı birlestikterdiń qatysýy qarastyrylmaǵan. Osydan kelip aldyn ala baǵalaý boıynsha aýdıtorlyq uıymdardyń 76%-y óz qyzmetin toqtatýyna týra kelip otyr. Al qalǵan aýdıtorlyq uıymdar «alym» tóleýge mindetteledi. Nátıjesinde aýdıtti júrgizýge ruqsat alýdan bastap, ony júrgizýge deıinge kezeń tolyq memlekettiń baqylaýynda bolady», - dedi «Aýdıtorlar alqasy» kásibı aýdıtorlyq uıymynyń basqarma tóraǵasy Danııar Nurseıitov ZOOM platformasynda ótken baspasóz máslıhatynda.

Sondaı-aq, táýelsiz sala mamandary atalǵan kásibı keńestiń fýnktsııalaryn eskere otyryp, aýdıtorlyq uıymdarǵa qatysty baqylaý jáne retteý fýnktsııalarynyń jalpy sany 18-den 30-ǵa deıin artatynyn jetkizdi.

Sharany uıymdastyrýshylar usynǵan málimetke seıkes, búginde Qazaqstanda 484 aýdıtorlyq uıym jáne 1869 aýdıtor bar.