Otandyq taýarlardyń 60 paıyzy sanıtarlyq talaptarǵa saı emes - Aızat Moldaǵasımova
ALMATY. QazAqparat - Almatyda tekserilgen otandyq ónimderdiń 60 paıyzy sanıtarlyq talaptarǵa saı emes. Bul týraly Almaty qalasy Qoǵamdyq densaýlyq saqtaý departamentiniń basshysy Aızat Moldaǵasımova aıtty, dep habarlaıdy QazAqparat tilshisi.
Búgin Almaty qalasynyń Óńirlik kommýnıkatsııalar qyzmeti alańynda ótken baspasóz máslıhatynda Almaty qalasy Qoǵamdyq densaýlyq saqtaý departamentiniń basshysy Aızat Moldaǵasımova otandyq taýarlardyń 60 paıyzy sanıtarlyq talapqa saı emestigin aıtty.
«Almatyda tekserilgen otandyq taýarlardyń 60 paıyzy mıkrobıologııalyq kórsetkishter boıynsha talapqa saı emes. Jalpy, 2017 jyly barlyǵy 5 mln teńge kóleminde halyq tutynatyn taýarlar satyp alynyp, tekserildi. 2017 jylǵy saraptama qorytyndylary negizinde, satyp alynǵan taýardyń 10,1% paıyzy qoldanystaǵy zańnama talaptaryna sáıkes emestigi anyqtaldy. Onyń ishinde: 10,4% - tamaq ónimderi, 20,0% - balalarǵa arnalǵan taýarlar, 21% - oıynshyqtar, 40% - jeńil ónerkásip ónimderi. Otandyq naryqty syrttan ákelingen sapasyz taýarlardan qorǵaýdy qamtamasyz etý maqsatynda 63 nysanǵa qatysty ákimshilik is qozǵalyp, 7 000 265 teńgege aıyppul salyndy. 19 sýbektiniń qyzmeti toqtatyldy. Barlyǵy 6 705 013 teńgege 4423,11 kg sapasyz ónim qoldanystan shyǵaryldy», - dedi departament basshysy.
Departmaent basshysynyń aıtýynsha, 2017 jyly vedomstvo josparly túrde 19 túrli tamaq ónimderin satyp alǵan.
«2613 satyp alynǵan ónimniń 264-i sanıtarlyq-epıdemıologııalyq saraptama qorytyndysyna sáıkes normatıvtik tehnıkalyq qujattama talaptaryna saı kelmedi. Onyń ishinde 12,9%-y otandyq óndiristiń taýarlary, 5,7%-y - EAEO elderi óndirisiniń taýarlary. Onyń 72 paıyzy durys tańdabalanbaǵan bolsa, 31% paıyzy mıkrobıologııalyq kórsetkishter boıynsha talapqa saı bolmaı shyqty. Otandyq taýarlardyń deni osy mıkrobıologııalyq talaptarǵa saı emes», - dedi ol.
Departament basshysynyń aıtýynsha, «Kýlıkovskıı», «Kolomenskıı», «Almatınskıı prodýkt» syndy birqatar kondıterlik ónim ónidirýshiler taýarlarynyń da talapqa saı emestigi anyqtalǵan.
«Kondıterlik ónimder boıynsha 138 synama 62 óndirýshiden satyp alyndy, 15 synamanyń sáıkes emestigi anyqtaldy», - dedi ol.
