Otandyq taýarlardy, jumystardy, kórsetiletin qyzmetterdi tolyqtaı elektrondyq satyp alýdy uıymdastyratyn ýaqyt jetti - M. Kópeı
Búgin QR Parlamenti Senatynda «Taýarlardy, qyzmetterdi satyp alý barysynda qazaqstandyq qamtý úlesin arttyrýdyń memlekettik saıasaty» atty taqyrypta ótken dóńgelek ústel jıynynda Senat Tóraǵasynyń orynbasary Muhambet Kópeı osylaı málim etti, dep habarlaıdy QazAqparat.
Sóz arasynda qazaqstandyq qamtýdy arttyra túsýdiń ózekti máselelerine toqtalǵan Muhambet Kópeı, osy baǵyttaǵy kedergilerge de toqtalyp ótti. Onyń aıtýynsha, bul problemalardyń qatarynda otandyq ónimder túriniń jutańdyǵy, taýarlar, jumystar men qyzmetter sapasynyń tómendigi, óndirýshilerdi júıeli qoldaýdyń joqtyǵy, mindetterdiń oryndalýyn ydyrańqy baqylaý sekildi keleńsizdikter oryn alýda. «Qazaqstandyq qamtýdy damytýdy tek taýarlardy, jumystar men kórsetiletin qyzmetterdi mindetti satyp alý dep qaraýǵa bolmaıdy. Memlekettiń básekege qabiletti, sapaly jáne suranysqa ıe taýarlar óndirisin yntalandyrýyn júıeli, keń aýqymdy keshen retinde qarastyrǵan mańyzdy. Parlament Senatynda qazaqstandyq qamtý máselesine arnalǵan zań jobasy qaralyp jatyr. Bul memlekettik satyp alýda qazaqstandyq qamtylym kólemin ulǵaıtý úderisin arttyrýǵa baǵyttalady. Jalpy, taýarlardy, jumystardy, kórsetiletin qyzmetterdi tolyqtaı memlekettik elektrondyq satyp alýdy uıymdastyratyn ýaqyt jetti. Bul úshin qoldanystaǵy zańnamany jetildirý qajet. Sonymen birge, qazaqstandyq óndirýshiler shyǵaratyn taýarlardyń, jumystar men kórsetiletin qyzmetterdiń tolyq bazasyn jasaý da mańyzdy bolyp tabylady», dedi M. Kópeı.
