Otandyq taýarlarda saılaýda daýys berýge úgitteıtin 3 mıllıon stıker japsyryldy - UKP
ASTANA. QazAqparat - Ulttyq kásipkerler palatasynyń arnaıy sharasy barysynda otandyq taýarlarda saılaýda daýys berýge úgitteıtin stıkerler paıda boldy. Bir aıdyń ishinde 3 mıllıonnan astam taýar úgit stıkerimen shyǵyp úlgerdi jáne 1 mıllıonnan astam otbasyny qamtydy. Bul týraly búgin QR UKP basqarma tóraǵasynyń orynbasary Nurjan Áltaev málim etti.
Eske salsaq, 26 naýryzda Qazaqstannyń Ulttyq kásipkerler palatasy saılaý naýqanyna baılanysty «Árkimniń daýysy mańyzdy!» atty aýqymdy aqparattyq aktsııany bastaǵan bolatyn.
«26 sáýirde saılaýshylardyń prezıdenttik saılaýǵa kelýi bizge óte mańyzdy. Osy maqsatta bir aı buryn QR ulttyq kásipkerler palatasy «Árkimniń daýysy mańyzdy!» atty aýqymdy aqparattyq aktsııany bastady. Bul shara belgili bir kandıdatty úgitteý nemese saıası kúshke qoldaý bildirý aktsııasy emes, jurtty óz daýysyn berýge shaqyrý», - dedi ol búgin baspasóz máslıhatynda. Onyń aıtýynsha, otandyq kásipkerler ózderi shyǵaratyn ónimderdiń syrtyna arnaıy «Árkimniń daýysy mańyzdy!» atty uran jazylǵan emblemalarmen tańbalandy. Dúken sórelerinde otandyq ónimderdiń barlyǵynda osyndaı stıkerler japsyrylady. Sonymen qatar, barlyq dúkenderde, meıramhanalar men dámhanalarda saılaý kúni belgilengen jáne azamattarymyzǵa saılaýǵa neshe kún qalǵanyn kórsetip turatyn kúntizbeler qoldanyldy.
«Taýarlarǵa japsyrylǵan stıkerlerdiń jalpy sany 3 mıllıonnan asyp ketti. Sharaǵa belsendi aralasqan eń kóp kompanııa Jambyl oblysynda tirkeldi. Ekinshi orynda - Pavlodar oblysy, úshinshi - Soltústik Qazaqstan oblysy. Aktsııa 26 naýryz ben 24 sáýir aralyǵynda 1 mıllıonnan astam qazaqstandyq otbasyny qamtydy. 80-nan astam bılbord ornatyldy. Internet-bannerler arqyly 3 mıllıonnan astam ǵalamtor paıdalanýshylary qamtyldy», - deıdi N. Áltaev.
