Otandyq taýar óndirýshilerge jeńildetilgen nesıeler qalaı beriledi
Arnaıy kartaǵa sáıkes, naqty 9 baǵyt boıynsha jumys istep jatqan oryndar jeńildetilgen nesıeler ala alady, dep xabarlaıdy QazAqparat tilshisi.
"Mysaly, búginde óńdeý kásiporny óziniń aqsha aınalymyn ulǵaıtý maqsatynda 100 mln teńge kólemindegi nesıeni alsa, banktiń 14 paıyzdyq syıaqy mólsherlemesimen ol aqshanyń ústinen 14 mln teńge tólep berýi tıis. Endigi kezekte, memleket mólsherlemeniń 4 paıyzyn, ıaǵnı 4 mln teńgesin óteıdi. Sonda kásipker bankke 10 mln teńge kólemindegi syıaqy mólsherlemesin tólep beredi. Aınalymdaǵy aqshany ulǵaıtýǵa beriletin nesıelerdiń merzimi - bir jyl", - deıdi QR Aýyl sharýashylyǵy vıtse-mınıstri Rústem Qurmanov.
Onyń aıtýynsha, kásiporyndar óz óndirisin jańartýǵa, ıa bolmasa, jańa nysandardy salýǵa da jeńildetilgen nesıe ala alady. Qazirgi kezde ondaı zaımnyń mólsherlemesi 16 paıyzdy quraıdy. Memleket ol stavkanyń 10 paıyzyn sýbsıdııalaıdy. Bul degenimiz, 100 mln teńgeniń syıaqy stavkasy 16 paıyz, ıaǵnı 16 mln bolsa, sonyń 10 mln teńgesi memlekettiń esebinen óteledi. Sonda kásipker banktiń bergen aqshasyna tek 6 mln-dy ǵana qosyp beredi.
"Budan bólek, ınvestıtsııalyq sýbsıdııalar da bar. Máselen, óńdeý kásiporny 100 mln teńgege qural-jabdyqtardy satyp alsa, memleket ol jabdyqtarǵa ketken shyǵynnyń 25 paıyzyn qaıtaryp beredi. Osylaısha, biz ónerkásipterdiń texnıkalyq jaǵdaıyn kóterýdi kózdeımiz", - dep atap kórsetti Qurmanov.
Aıta keteıik , Úkimettiń búgingi otyrysy barysynda QR Aýyl sharýashylyǵy mınıstri Asqar Myrzaxmetov ónim óńdeý kásiporyndarynyń kartasy aıasynda memlekettik qoldaýǵa ıe bolatyn naqty nysandardyń anyqtalǵanyn jetkizdi. Premer-Mınıstr Baqytjan Saǵyntaev ónim óńdeý salasyndaǵy kásiporyndardy memlekettik qoldaý katasyn iske asyrýǵa tapsyrma berd i.
