Otandyq taksı platformalary jasala ma – Eńbek mınıstriniń jaýaby

NUR-SULTAN. QazAqparat – QR Eńbek jáne halyqty áleýmettik qorǵaý mınıstri Tamara Dúısenova otandyq taksı platformalaryn qurý týraly suraqtarǵa jaýap berdi, dep habarlaıdy QazAqparat tilshisi.

«Qazirgi taksı platformalarynyń kóbi sheteldik. Taksı júrgizýshileri de «ıAndekstiń» komıssııasy óte joǵary ekenin, tabystyń bir bóligi shetelge ketip jatqanyn aıtýda. Olardy otandyq platformaǵa aýystyrý qaralyp jatyr ma?» - dep suraq qoıdy tilshiler Úkimet otyrysynan keıin.

Óz kezeginde T. Dúısenova barlyq protsestiń naryq talabynan týyndaıtynyn, otandyq platformalarǵa da esh kedergi joqtyǵyn atap ótti.

«Sondyqtan naryqqa otandyq platformalar ózderi shyǵyp, azamattarǵa jumys beretin bolsa, oǵan eshqandaı kedergi, qarsylyq joq. Ázirge bizdiń ekonomıkamyzdaǵy platformalar – osy. Olar Qazaqstanda jumys istep jatyr, Qazaqstanǵa salyǵyn tólep otyr. Azamattarǵa jumys isteýge múmkindik berip otyr. Endi osy azamattardyń áleýmettik qamsyzdandyrý máselesin sheshý mindetin qoıyp otyrmyz. Oǵan da kelisti. Qazir pılotty túrde bastap, jyl sońyna qaraı, zańǵa ózgerister engizemiz», - dep jaýap berdi Eńbek mınıstri.

Buǵan deıin Tamara Dúısenova ıAndeks, Ýber, Volt jáne Glovo platformalarynda jumys isteıtinderdiń de áleýmettik quqyqtary qorǵalatynyn aıtqan edi.

QR Premer-Mınıstri Álıhan Smaıylov ta onlaın platformalarǵa qatysty pılottyq jobany qoldaıtynyn aıtty.