Otandyq sút saýdasynda uzaq merzimge saqtalatyn suıyq súttiń ótimi basymyraq
ALMATY. Jeltoqsannyń 4-i. QazAqparat /Ádilet Musahaev/ - Uzaq merzimge saqtalatyn suıyq sút ónimderi Qazaqstan naryǵyndaǵy suıyq ónimderdiń 20 paıyzyn ǵana quraıdy.
Bul jaıynda «Ortalyq Azııa Tetra Pak» kompanııasynyń Bas dırektory Mıhaıl Kamyshnyı QazAqparat tilshisine bergen suhbatynda málim etti.
Onyń aıtýynsha, búgingi tańda elimizdegi súttiń jáne sútten jasalatyn ónimderdiń basym bólshegin qaptalmaǵan ónimder qurap otyr. «Naryqtaǵy arnaıy qaptalǵan sút ónimderiniń ishinde taza sút 65 paıyz, qyshqyl sút 25 paıyzdy qurasa, konsentraldy sút 4 paıyzǵa jetip otyr. Qazaqstan boıynsha suıyq sút óniminiń paıdalanýyn adam basyna shaqqanda, jylyna bir adam 66 lıtr sút tutynady eken, bul kórsetkish Batys Eýropa elderimen salystyrǵanda anaǵurlym tómen», deıdi Bas dırektor. Sonymen qatar ol Qazaqstan naryǵyndaǵy sút ónimderi qaptalǵan túrine qaraı damyp jatqandyǵyn jetkizdi. «Qaptalǵan aq sút, uzaq merzimge saqtalatyn suıyq sút jáne pasterlengen bolyp ekige bólinedi. Osy kezekte uzaq merzimge saqtalatyn suıyq súttiń ótimi basymyraq», deıdi ol.
Sút adam densaýlyǵyna paıdaly azyq ekeni belgili, óıtkeni onyń quramynda kóptegen dárýmender men kaltsıı bar. Sondyqtan ony kóp mólsherde paıdalaný qajet. Bas dırektor «Tetra Pak» kompanııasy osy baǵytty qoldap, sút ónimderin kóbirek tutynýǵa arnalǵan kóptegen sharalarǵa atsalysyp júrgendigin de aıtyp ótti. Sondaı-aq ol sońǵy 3 jylda Qazaqstanda qaptalǵan sút ónimderin tutyný kórsetkishi 11 paıyzǵa tómendegenin jetkizdi. «2008 jylmen salystyrǵanda 2009 jyly 5 paıyzǵa tómendep otyr. Osy turǵyda demeý beretin memlekettik arnaıy baǵdarlama qajet», deıdi M.Kamyshnyı.
