Otandyq sút ónimderi sapa men baǵa jaǵynan kórshiles memleketter, sonyń ishinde KO elderi tarapynan qysymǵa ushyraýda - mınıstr
ASTANA. 28 naýryz. QazAqparat /Gúlmıra Álıakparova/ - Otandyq óndirýshiler keıbir sút ónimderiniń sapasy men baǵasy jaǵynan kórshiles memleketter, sonyń ishinde Kedendik odaq elderi tarapynan qysymǵa ushyraýda. Bul týraly búgin QR Aýyl sharýashylyǵy mınıstri Aqylbek Kúrishbaev aıtty.
Mınıstr atap kórsetkendeı, sút salasy eldiń aýyl sharýashylyǵy kesheniniń negizgi salasy bolyp tabylady. Respýblıkada óndiriletin barlyq azyq-túlik óniminiń 20 paıyzy osy salanyń úlesinde. Adam basyna shaqqanda sút ónimderin paıdalaný kólemi de jyl saıyn artyp keledi. Qazaqstanda jáne búkil álemde sút ónimderine suranys joǵarylap keledi. Biraq óndiris qarqynynyń halyq sanynyń artý qarqynyna ilese almaýynan dúnıejúzilik azyq-túlik problemasynyń órshýi jalǵasýda.
«Bul túıitkil sút salasyn da aınalyp ótpedi. Máselen, bizde jyl saıyn sút óndirisi artyp otyrǵanyna qaramastan, ónerkásiptik óńdeýge onyń tek 30 paıyzy ǵana jiberiledi. Onyń birqatar obektıvti sebebi de bar. Otandyq óndirýshiler keıbir sút ónimderiniń sapasy men baǵasy jaǵynan kórshiles memleketter, sonyń ishinde Kedendik odaq elderi tarapynan qysymǵa ushyraýda», - dedi ol.
Osy rette vedomstvo basshysy, atalmysh saladaǵy ózekti máselelerdi talqyǵa salyp, onyń túıinin tarqatatyn sheshimderdi qabyldaýda, búgin mınıstrlik qabyrǵasynda ótip jatqan «Kedendik odaq aıasynda Qazaqstan Respýblıkasynyń sút salasynyń jaǵdaıy men problemasy» taqyrybyndaǵy konferentsııanyń mańyzy joǵary ekendigin aıtty.
