Otandyq sportshylardy koronavırýstan saqtandyrý úshin ahýaldyq shtab quryldy
NUR-SULTAN. QazAqparat – QR Ulttyq Olımpıadalyq komıteti otandyq sportshylardy koronavırýstan saqtandyrý úshin ahýaldyq shtab quryp, jarys kestelerin qaıta qaraýda, dep habarlaıdy QazAqparat.
«Ulttyq Olımpıadalyq komıtet otandyq sportshylardyń qaýipsizdigin qamtamasyz etý úshin barlyq sharalardy qolǵa alady. Eldiń olımpıadalyq vedomstvosynda koronavırýsqa baılanysty keleńsiz jaǵdaıdan saqtaný maqsatynda arnaıy shtab quryldy. Ulttyq quramalardyń jarys jáne jattyǵý kesteleri qaıta qarastyrylýda», - delingen aqparatta.
Aıta keteıik, búgin Memleket basshysy Qasym-Jomart Toqaev Qazaqstan azamattarynyń densaýlyǵyn qorǵaý maqsatynda keshendi sharalar qabyldaýdy tapsyrdy. Osyǵan baılanysty Qazaqstan Ulttyq Olımpıadalyq komıtetiniń prezıdenti Tımýr Qulybaev ulttyq quramalardyń qaýipsizdigin baqylaýdy kúsheıtetinin málimdedi.
«Ulttyq Olımpıadalyq komıtet úshin sportshylardyń densaýlyǵy óte mańyzdy. Saqtyq sharalarymen qatar, qaýipsizdik sharalaryn da kúsheıtý qajet. Bizde ulttyq federatsııalarmen birge koronavırýstyń taralmaýy jáne qazaqstandyq sportshylardy indetten qorǵaý boıynsha aldyn-alý sharalaryna qatysty birtutas jáne berik ustanym bolýy kerek. Aldyn alý sharalarynyń barlyǵyn qoldaný qajet», - dedi Tımýr Qulybaev.
UOK basshysynyń tapsyrmasy boıynsha qurylǵan ahýaldyq shtab quramyna túrli departamenttiń qyzmetkerleri kirdi. Arnaıy shtab qyzmetine kúndelikti monıtorıng júrgizý,qazaqstandyq sportshylardyń qaýipsizdigin qamtamasyz etý úshin usynystar ázirleý jáne qajet bolǵan jaǵdaıda shuǵyl sharalar qoldaný kiredi.
Búgin Qazaqstan UOK shtab-páterinde UOK bas hatshysy Sáken Musaıbekov, vıtse-prezıdent Andreı Krıýkovtyń basqarýymen memlekettik jattyqtyrýshylar men ulttyq federatsııa ókilderine arnalǵan jınalys ótti. Jıynda ulttyq federatsııalarǵa qazaqstandyq komandalardyń sheteldik oqý-jattyǵý jıyndary men jarystarǵa qatysý kestesin qaıta qaraý usynyldy.
Qazaqstan UOK barlyq ulttyq sport federatsııalaryn olımpıadalyq sport túrlerinen jaǵdaıdy erekshe baqylaýǵa alýǵa jáne sportshylardyń densaýlyǵyn barynsha qorǵaýǵa shaqyrdy.
