Otandyq sottardyń jumys sapasy bir deńgeıde - Bektas Beknazarov
ASTANA. 8 shilde. QazAqparat /Arman Asqarov/ - 2011 jyldyń alǵashqy alty aıynyń nátıjesi boıynsha otandyq sottardyń jumys sapasy bir deńgeıde, turaqty jaǵdaıda saqtalyp keledi.
Bul týraly búgin aǵymdaǵy jyldyń birinshi jartyjyldyǵyn qorytyndylaýǵa arnalǵan sýdıalardyń keńeıtilgen otyrysynda QR Joǵarǵy sotynyń tóraǵasy Bektas Beknazarov málim etti.
Onyń habarlaýynsha, Joǵarǵy sot organdary tarapynan aýdandyq jáne oǵan teńestirilgen sot úkimderiniń kúshin joıý kórsetkishi ótken jylmen salystyrǵanda, tek 0,1 paıyzǵa ǵana tómendep, 0,5 paıyzdy qurady. Biraq azamattyq ister boıynsha bul kórsetkish 0,2 paıyzǵa kóterilip, 0,6 paıyzǵa teń boldy. «Jalpy, birinshi jartyjylda biz 345 myń azamattyq, ákimshilik jáne qylmystyq isterdiń óndirisin aıaqtadyq. Respýblıkada sottalǵandardyń sany 4974 adamǵa azaıyp, bas bostandyǵynan aıryý jazasyn qoldaný kórsetkishi de tómendedi. 2010 jyldyń alǵashqy alty aıynda bas bostandyǵynan aıyrylǵan azamattardyń sany 7533 adam bolsa, aǵymdaǵy jyly bul kórsetkish 5734-ke deıin tústi. Bul jalpy sottalǵandardyń 40,8 paıyzyn qurap otyr», - dedi B.Beknazarov.
