Otandyq parlamentarızm tarıhynda jańa kezeń bastalmaq - Senat tóraǵasy Májilis pen máslıhat saılaýy týraly
«Búgin Memleket basshysy Qasym-Jomart Kemeluly Toqaev Senat otyrysyna qatysty. Konstıtýtsııaǵa sáıkes Prezıdentimiz Palata tóraǵasy qyzmetine kandıdatýrany usynyp, maǵan zor senim bildirdi. Bul – men úshin úlken jaýapkershilik. Áriptesterim Memleket basshysynyń usynysyn qoldap, daýys berdi. Aldaǵy ýaqytta Prezıdentimizdiń jáne halyqtyń senimin aqtaý úshin bar kúsh-jigerimdi jumsaımyn»,-dep jazdy Senat tóraǵasy.
Sonymen qatar ol Memleket basshysy jýyrda Palata depýtattarynyń bir bóligi saılanǵanyn jáne birneshe senatordyń taǵaıyndalǵanyn aıtyp, osymen Senat quramyn jańǵyrtý úderisi aıaqtalǵanyn atap ótti. Bul – elimizde júrgizilip jatqan aýqymdy saıası reformalardyń naqty nátıjeleriniń biri.
Qasym-Jomart Kemeluly Senattyń memlekettik basqarý salasyndaǵy róli aıryqsha ekenin de tilge tıek etti. Memleket basshysy búginde Palata óz jumysyn abyroımen atqaryp kele jatqanyn jáne senatorlar barlyq reformany júzege asyrýǵa belsene atsalysqanyn aıtty. Mundaı baǵa bizdi odan ári yntalandyryp, jumysymyzǵa tyń serpin beredi.
Otyrys barysynda Prezıdentimiz Senattyń aldynda turǵan negizgi maqsattardy aıqyndap berdi. Kún tártibindegi ózekti máselelerge qatysty naqty mindetter júktedi. Bul rette qolǵa alynǵan jańa bastamalardy zańnamalyq turǵydan ýaqtyly ári sapaly túrde qamtamasyz etýdiń mańyzy zor.
Memleket basshysy aldaǵy Májilis jáne máslıhattar saılaýyna da toqtalyp, atalǵan saıası naýqan negizgi memlekettik ınstıtýttardy keshendi túrde jańǵyrtýdyń mańyzdy satysy bolatynyn atap ótti. Osylaısha, otandyq parlamentarızm tarıhynda jańa kezeń bastalmaq.
Prezıdentimiz munymen toqtap qalmaıtynymyzdy, alda áli aýqymdy jumys bar ekenin aıta kele: «Elimizde «Kúshti Prezıdent – yqpaldy Parlament – esep beretin Úkimet» qaǵıdaty ornyǵa tústi. Bul reformalar bılik ınstıtýttary júıesiniń tepe-teńdigin qalyptastyrady. Eldegi saıası úderiske azamattardyń qatysýyna jol ashady. Sondaı-aq memlekettik basqarý júıesiniń tıimdiligin arttyra túsedi», – dedi.
«Jalpy, Memleket basshysy atap ótkendeı, qoǵamda órkenıetti saıası dástúrdi ornyqtyrý – negizgi maqsattardyń biri. Ol úshin joǵary saıası jaýapkershilik mádenıetin qalyptastyrý qajet. Munyń bári – Qazaqstandy tuǵyry berik, ekonomıkasy qýatty, rýhy asqaq, birligi bekem memleket retinde urpaqqa tabystaý jolyndaǵy mańyzdy qadamdar. Sondyqtan Parlament Senaty aldaǵy ýaqytta osy baǵyttaǵy basymdyqtarǵa basa mán berip, Ádiletti Qazaqstan qurý baǵytyndaǵy belsendi jumysyn jalǵastyra beredi»,-dedi Máýlen Áshimbaev.
Foto: facebook.com/m.ashimbayev
