Otandyq ónimdi tutynyp, jergilikti taýarlarǵa suranys artsa, ekonomıkanyń damıtyny anyq - Májilis depýtaty F. Qarataev
ASTANA. QazAqparat - Qaı memleket te otandyq taýardyń arta túsýi úshin barlyq jaǵdaıdy jasaıdy. Álemdik qoǵamdastyqtyń bir múshesi retinde Qazaqstan da básekege qabiletti ónimder shyǵarýdy jolǵa qoıyp keledi.
Osy oraıda, «Nur Otan» partııasynyń múshesi,QR Parlamenti Májilisiniń depýtaty, osy Palatanyń Áleýmettik-mádenı damý komıtetiniń múshesi Fahrıddın Qarataev óz pikirimen bólisti.
- Álemdegi damyǵan kez kelgen memleketti alyp qaraıtyn bolsaq, birinshi kezekte, barlyǵynda jergilikti taýar óndirýshilerdiń ónimderine erekshe mán berilgen. Osynyń arqasynda ekonomıkanyń negizgi kúre tamyry bolyp sanalatyn saýda-sattyq qarqyndy damyǵan.
Elbasymyz elimizde shyǵyp jatqan otandyq ónimderdi qashanda qoldap kele jatqany barshamyzǵa belgili. Osy jaqynda otandyq ónimderdiń suranysyn arttyrý maqsatynda elordamyzda «Qazaqstanda jasalǵan» atty aqtsııasy ótip, respýblıkamyzdyń barlyq óńirlerinen kelgen 300-den asa otandyq taýar óndirýshiler óz ónimderin el nazaryna usynyp, memleket tarapynan qoldaý tapty. Osynyń nátıjesinde otandyq óndirýshiler jeńil ónerkásip pen kólik qurastyrý, qurylys salalarynda tyń bastamalarǵa baǵyt alyp keledi. Mysaly, sońǵy 6 jylda 2 myń ónerkásiptik kásiporyn memlekettik qoldaýǵa ıe boldy, 500 myń jumys orny ashyldy. Endi «Nurly jol» ınfraqurylymdyq damytýdyń 2015-2019 jyldarǵa arnalǵan memlekettik baǵdarlamasyn júzege asyrý úshin otandyq kóliktik mashına jasaý ónimine suranys artatyny anyq. Jol jóndeý kezinde 95 paıyz otandyq ónim materıaldaryn qoldanýǵa múmkindik týǵan.
Jalpy aıtqanda, elimizde otandyq óndirýshilerge basa nazar aýdarylyp, memlekettik baǵdarlamalar qabyldandy. Osynyń arqasynda otandyq ónimge suranys artyp, kásipkerlerge kómek kórsetilip, ózimizde óndirilgen ónimder halyq qýanyshyn arttyryp keledi.
Búginde qazaqstandyqtar syrttan aǵylǵan ónimderdi sapasyna qaraı tańdap, talǵaıtyn jaǵdaıǵa jetti. Shetelde shyǵarylǵan taýardy otandyq kásipkerler óndirýge qaýqarly. Óndirip te jatyr. Turǵyndar otandyq ónimdi tutynyp, jergilikti taýarlarǵa degen suranys artsa, el ekonomıkasynyń odan ári qaryshtap damıtyny anyq. Endeshe, barsha qazaqstandyqtardy ózgeniń qyzylyna qyzyqpaı, otandyq taýardy tańdaýǵa shaqyrar edim.
