Otandyq ónimdi álemdik naryqtarǵa shyǵarýǵa arnalǵan kóliktik-logıstıkalyq keshen qurylady - Parlament
ASTANA. 28 maýsym. QazAqparat - Búgin QR Parlamenti Senatynyń jalpy otyrysynda palata depýtattary «Qazaqstan Respýblıkasyndaǵy kólik týraly» jáne «Saýda maqsatynda teńizde júzý týraly» QR zańdaryna ózgerister men tolyqtyrýlar engizý týraly» zańyn qabyldady.
Atalǵan qujat qazaqstandyq taýarlardy dúnıejúzilik ótkizý naryqtaryna jyljytý jáne eldiń tranzıttik áleýetin barynsha paıdalaný maqsatynda kóliktik logıstıkalyq keshen qurý maqsatyn kózdeıdi. Bul rette zań arqyly halyqaralyq mańyzdy mártebesi bar teńiz porttaryn el Úkimeti aıqyndaǵan sharttar men ulttyq basqarýshy holdıngtiń, ulttyq kompanııalardyń aktsııalaryn tóleýge múmkindik jasaıtyn ózgerister engizý qarastyrylǵan.
Sondaı-aq, Parlament qabyldaǵan zańda halyqaralyq mańyzdy mártebesi bar teńiz porttarynyń jekeshelendirýge jatpaıtyny belgilenip otyr. «Qujat Elbasynyń Úkimetke júktegen tapsyrmasyna jáne taıaýda ótken Astana ekonomıkalyq forýmynda júktegen mindetterin júzege asyrýǵa quqyqtyq negiz qalyptastyrady. Atap aıtqanda, Prezıdent Qazaqstanda álemdik saýda-logıstıkalyq jáne iskerlik hab retinde qalyptasýyn qamtamasyz etýdi júktegen edi. Bul rette jańa Jibek jolynyń basty elementi - bul «Qazaqstan temir joly» ulttyq kompanııasynda negizi qalyptasatyn logıstıkalyq hab, álemdik deńgeıdegi kólik logıstıkalyq kompanııasy bolyp tabylady. Ol Qazaqstan eksportyn álemdik ótkizý naryqtaryna tıimdi jyljytýdy qarastyrady»,- dedi qujat týraly baıandaǵan senator Jumabek Tóregeldınov. Onyń aıtýynsha, jańa kóliktik logıstıkalyq kompanııa eldiń kólik áleýetin tolyq ári jan-jaqty paıdalanatyn bolady.
