Otandyq ónerdiń bolashaǵy Qazaqstannyń daryndy da talapty jastarynyń qolynda - Astana qalasynyń ákimi I. Tasmaǵambetov
ASTANA. 3 qarasha. QazAqparat - Búgin Astanada Beıbitshilik jáne kelisim saraıynda «Shabyt» XVI Halyqaralyq shyǵarmashyl jastar festıvaliniń saltanatty ashylý rásimi bolyp ótti.
«Ónerdiń joly erekshe, ol tynbaı eńbek etý di, maqsatshyl bolýdy jáne týa bitken tabıǵı talantty talap etedi. Otandyq ónerdiń bolashaǵy Qazaqstannyń daryndy da talapty jastarynyń qolynda. Búgingi festıval Astanada 1997 jyldan beri ótkizilip keledi jáne jyl saıyn ónerdiń túrli salalarynda jas talanttardyń jańa esimderin ashyp keledi. «Shabyt» elimiz úshin talaı jańa esimderdi syılady, sondyqtan da shyǵar, olardyń shyǵarmashylyq jolyndaǵy jańa kezeńniń basy Astanamen tyǵyz baılanysty», - delingen Astana qalasy mádenıet basqarmasynyń basshysy Bolat Majaǵulov oqyp bergen elorda ákimi Imanǵalı Tasmaǵambetovtiń festıval qatysýshylary men qonaqtaryna arnalǵan quttyqtaý sózinde.
Esterińizge sala keteıik, festıval 3 - 8 qarasha aralyǵynda ótedi.
XVI Halyqaralyq «Shabyt» shyǵarmashyl jastar festıvali uıymdastyrý komıtetiniń sheshimi boıynsha baıqaýǵa qatysýshylar «Klassıkalyq mýzyka» nomınatsııasy (Aǵashtan jasalǵan úrmeli aspaptar, mystan jasalǵan úrmeli aspaptar, soqpaly aspaptar, baıan-akkordeon), «Beıneleý óneri» nomınatsııasy (Músin óneri, sándik-qoldanbaly óner), «Halyq mýzykasy» nomınatsııasy (Halyqtyq aspaptar ansambli), «Estradalyq vokal» nomınatsııasy, «Úzdik ádebı shyǵarma» nomınatsııasy (Proza), «Horeografııa» nomınatsııasy (Halyq bıi) boıynsha synǵa túsedi.
Festıvaldiń bas júldesi - Qazaqstan Respýblıkasy Prezıdentiniń kýbogy. Sondaı-aq Gran-prı, «Laýreat» ataǵyna 1, 2, 3 syılyq, «Shabyt» medali jáne shyǵarmashyl ujym ústeline qoıatyn «Shabyt» medali, ataýly dıplomdar men Qazaqstannyń tanymal mádenıet jáne óner qaıratkerleriniń syılyqtary, «Dıplomant» ataǵyn berý dıplomdary, festıvalǵa belsendi qatysqany úshin gramotalar, jeke nomınatsııalar boıynsha arnaıy dıplomdar men syılyqtar beriledi.
Festıval jeńimpazdardy marapattaýmen jáne laýreattardyń Gala-kontsertimen aıaqtalady.
