Otandyq oqý oryndarynyń aldynda jastardy jan-jaqty, joǵary bilimmen qamtý mindeti tur -B.Qaıypova
ASTANA. 21 sáýir. QazAqparat /Kenjekeı Toqtamurat/ - «Otandyq oqý oryndarynyń aldynda jastardy jan-jaqty, joǵary bilimmen qamtý mindeti tur»,
dedi búgin Tuńǵysh Prezıdent murajaıynda Qazaq ekonomıka ýnıversıtetiniń rektoratymen bolǵan kezdesý barysynda jýrnalısterge suhbat bergen murajaı dırektorynyń orynbasary Botakóz Qaıypova.
«Básekege qabiletti el qurýda memlekettiń saıasaty ozat ult, bilimdi jas tárbıeleýge baǵyttalatyny anyq. Ǵasyrymyz bilim berý dáýiri, ınnovatsııa dáýiri dep atalatyndyqtan, óskeleń urpaqty ártúrli bilim berý jobalaryna qatystyryp otyrý mańyzdy. Árıne, 1993 jyldan beri qazaq jastarynyń úzdik sheteldik ýnıversıtetterde bilim alýǵa múmkindik týǵyzǵan «Bolashaq» baǵdarlamasy osy baǵytta úlken tirek boldy. Alaıda búgingi tańda jastardy jan-jaqty bilimmen qamtý mindeti otandyq oqý oryndarynyń aldyna qoıyldy», - deıdi B.Qaıypova.
«Otandyq joǵary oqý oryndary halyqarallyq attestatsııalardan ótip, elimizde «Nazarbaev Ýnıversıteti», zııatkerlik mektepter ashyldy. Bulardyń barlyǵy túlekterimizdiń dıplomdary álemdik bilim berý ortalyqtarynyń dıplomdarymen básekelese alatyn dárejege jetýi úshin qolǵa alynyp jatyr. Ol bir kúnde bola qoımaıdy jáne bul maqsatty shyndyqqa aınaldyrý úshin belgili bir ýaqyt qajet. Alaıda talpynys bolmasa mindet eshqashan oryndalmaıtyny anyq. Sondyqtan da búgingi kezdesý elordadaǵy JOO-dyń keńistik úligisin nasıhattaý aıasyndaǵy Tuńǵysh Prezıdent murajaıynyń alǵa qoıǵan is-sharalarynyń biri ǵana bolyp tabylady», - deıdi ol.
Onyń aıtýynsha, Tuńǵysh Prezıdent murajaıy aldaǵy ýaqytta Astanadaǵy kóshbasshy oqý oryndary - L.G.Gýmılev atyndaǵy EUÝ, S.Seıfýllın atyndaǵy Qazaq Agrotehnıkalyq ýnıversıeti men Medıtsınalyq akademııa ujymymen kelisip, oqýshylar úshin osyndaı kezdesýler ótkizedi.
«Meniń oıymsha, bul kezdesýler QR Tuńǵysh Prezıdentiniń murajaıynda ótýi erekshe. Sebebi bul Elbasynyń Astanadaǵy alǵashqy rezıdentsııasy jáne munda elimizdiń egemendik jyldarynyń kórinisi bola alatyn toptama zaldary bar», - deıdi B. Qaıypova.
Murajaıdyń bilim berý qyzmeti Memleket basshysynyń «Zııatkerlik ult-2020» jobasyn basshylyqqa ala otyryp, ıntellektýaldy elıtany qalyptastyrý arqyly Qazaqstandy básekege qabiletti adamdyq kapıtaly bar memleketke aınaldyrýdy maqsat tutady.
