Otandyq naryqtaǵy mıkroqarjylyq qyzmettiń damýynda oń betburys bar - Halyqaralyq mıkroqarjylyq konferentsııa
ASTANA. Mamyrdyń 26-sy. QazAqparat /Jasulan Amanbaıuly/ - Búgin Astanada bastalǵan Halyqaralyq mıkroqarjylyq konferentsııada mamandar otandyq naryqtaǵy mıkroqarjylyq qyzmettiń damýynda oń betburys bar ekendigin atap kórsetýde,
dep habarlaıdy QazAqparat.
Sharada sóz alǵan Ekonomıkalyq damý jáne saýda vıtse-mınıstri Marat Qusaıynov, «básekege qabiletti mıkroqarjylyq naryqty qurý jáne mıkronesıeleý uıymdarynyń qyzmetine ınnovatsııalyq sheshimderdi engizý sıqty mindetter turǵandyǵyn» erekshe atap ótti. «Búgingi konferentsııa bizdiń memleketterimizdegi mıkronesıeleý júıesiniń damýyna óz áserin tıgizedi dep senemin», dep atap kórsetti ol.
Mamandardyń sózine qulaq túrsek, «Qazaqstanda qazirgi ýaqytta 1700 mıkronesıeleý uıymdary tirkelgen. 2008 jyly 170 myńǵa tarta nesıeler berilse, 2009 jyly 250 mln. astam qarjyǵa 190 myń nesıe usynǵan», deıdi vıtse-mınıstr.
Qazaqstannyń mıkroqarjylyq uıymdar qaýymdastyǵynyń atqarýshy dırektory Anatolıı Glýhovtyń aıtýynsha, bundaı oń úderisterdiń baıqalýyn ekonomıkadaǵy jaǵymdy jaǵdaıdyń qalyptasýymen jáne Úkimettiń mıkroqarjylyq uıymdarǵa kórsetip otyrǵan kómegimen túsindirýge bolady.
«Atalmysh shara otandyq naryqtaǵy mıkronesıeleý uıymdarynyń sheteldik áriptesterimen tájirıbe almasýyna jáne áleýetti ınvestorlar men donorlarmen kezdesýine múmkindik bermek. Jıyn banktik emes qarjylyq qyzmetterdiń damýyna oń betburys ákeledi degenge tolyq senimdimin», dedi A. Glýhov.
Mıkroqarjylyq ortalyqtyń dástúrli jıynyna bıyl álemniń 50 shaqty elinen 400-den astam mıkrokredıttik uıymdardyń ókilderi, ınvestorlar men sarapshylar kelip qatysýda.
Úsh kúnge sozylatyn konferentsııa Qazaqstan Úkimeti atynan Ekonomıkalyq damý jáne saýda mınıstrliginiń qoldaýymen ótkizilýde. Sonymen qatar ol Qazaqstannyń «Eýropaǵa jol» úkimettik baǵdarlamasynyń josparynda bekitilgen.
