Otandyq MÓZ-der jetildirilgen soń Qazaqstan «Eýro-4», «Eýro-5» sapaly avıajanarmaımen qamtamasyz etiledi
ASTANA. QazAqparat - 2016 jylǵa josparlanǵan otandyq úsh munaı óńdeý zaýyty zamanaýı talaptarǵa saı jetildirilgennen keıin, Qazaqstan naryǵy «Eýro-4», «Eýro-5» sapasyndaǵy otandyq avıatsııalyq janarmaımen qamtamasyz etiletin bolady. Bul týraly búgin «Qazaqstandaǵy avıajanarmaı» atty dóńgelek ústel otyrysynda QR Energetıka mınıstrligi Munaı óndirisin damytý departamentiniń dırektory Qýandyq Qulmyrzın aıtty.
«Elimizdiń Shymkent, Atyraý jáne Pavlodar qalalarynda ornalasqan úsh munaı óńdeý zaýytynda jetildirý jáne zamanaýı qýattylyqqa shyǵý jumystary júrgizilip jatyr. Sondyqtan biz jaqyn bolashaqta otandyq avıajanarmaı tutynýshylaryn «Eýro-4», «Eýro-5» sapaly otandyq avıajanarmaımen qamtamasyz ete alatyn deńgeıge jetemiz degen úmittemiz» - dedi ol.
Dırektordyń aıtýynsha, Energetıka mınıstrligi munaı ónimderin, sonyń ishinde avıatsııalyq janarmaıdy jetkizý josparyn bekitýde. «Bul tizim QR Investıtsııalar jáne damý mınıstrligi (IDM) Azamattyq avıatsııa komıtetiniń bergen málimetteri boıynsha áýejaılar men áýekompanııalardyń tutyný kólemin esepke ala otyryp jasalady. Búginde grafık bekitilip, Azamattyq avıatsııa komıtetine, áýejaılar men avıakompanııalarǵa jiberilgen», - dep túsindirdi ol.
Aıta keteıik, Azamattyq avıatsııa komıtetiniń derekteri boıynsha, Qazaqstandaǵy áýejaılardyń avıakerosındi qoldanýy jylyna 600 myń tonnany quraıdy. Bul kólemniń kóp bóligin Eır-Astana jáne «Skat» sııaqty iri kompanııalar paıdalanady. Sondaı-aq, komıtet málimetteri boıynsha, jyl saıyn avıajanarmaıdy tutyný jyl saıyn shamamen 10 paıyzǵa artyp keledi.
Búginde Qazaqstanda 21 áýejaı jumys istep tur. Olardyń 11-i IKAO standarttaryna tolyqtaı jaýap beredi.
Aıta keteıik, búgingi sharany Halyqaralyq Áýe Transporty qaýymdastyǵy (IATA) men «KAZLOGISTICS» Qazaqstan kólikshiler odaǵy uıymdastyryp otyr.
