Otandyq qurylys materıaldaryn shyǵaratyndar qomaqty shyǵynǵa batýy múmkin - Baqtyqoja Іzmuhambetov
Onyń aıtýynsha, «AMANAT» partııasynyń 2023-2027 jyldarǵa arnalǵan saılaýaldy baǵdarlamasynyń aldyndaǵy on mindettiń biri - qala men aýyldarda adamdardyń ómiri úshin qolaıly jaǵdaı jasaý, turǵyn úımen jáne sapaly ınfraqurylymmen qamtamasyz etý. Bolashaqta 730 myńnan astam otbasy úshin qolaıly baǵadaǵy 78 mıllıon sharshy metrden astam jańa turǵyn úı salý jospary bar.
«Partııa baǵdarlamasyna oraı jeke qurylys kompanııalaryn áleýmettik turǵyn úı salýǵa yntalandyrý joldary qarastyrylmaq. Jańadan «Qurylys» kodeksi jáne «Rıeltorlyq qyzmet týraly» zańdar qabyldanatyn bolady. Meniń saýalym qurylys salasyndaǵy otandyq taýar óndirýshi kásipkerlerdi qoldaýǵa qatysty. Turǵyn úı salý jáne jóndeý jumystaryna tenderler sol jobadaǵy qurylysty tolyq tapsyrýǵa arnalyp jarııalanady. Bul turǵyda qurylys jobasyn jeńip alǵan merdigerdiń konkýrstyq usynysynda qurylys materıaldarynyń (jabyn plıtasy, kirpish, tsement, túrli qubyrlar, esik, terezeler, taǵy basqalary) qaı bóligi elimizde óndireletini, qaı materıaldar syrttan alatyny, sondaı-aq materıaldyń qunyn qalaı, qashan óteıtini merdigerdiń tenderge usynysynda kórsetilip, tender sheshiminde eskerilse durys bolar edi. Óıtkeni kóp jaǵdaıda qurylysqa qajet taýardy óndirýshi kompanııa tıesili qarjysyn alý úshin merdigerdiń qurylys jobasyn tolyq bitirýin kútýge májbúr. Bul keıde jyldarǵa sozylýy múmkin. Nátıjesinde, qurylys materıalyn shyǵaratyn kompanııa bank aldyndaǵy bereshegin ótegenshe uzaq ári qosymsha shyǵynǵa batady», - dedi B. Іzmuhambetov Premer-Mınıstr Álıhan Smaıylovtyń atyna joldaǵan saýalynda.
Onyń aıtýynsha, mundaı jaǵdaı otandyq qurylys materıaldaryn shyǵaratyn kompanııalarǵa úlken qaýip tóndirip, naryqtan yǵystyrýy múmkin.
«Qazaqstan Respýblıkasyndaǵy memlekettik satyp alý zańynyń sharttaryna ózgerister men tolyqtyrýlar engizilgen kezde jáne jańadan qabyldanatyn «Qurylys» kodeksinde osy másele eskerilýi kerek dep sanaımyz», - dedi depýtat.
