Otandyq qurylys materıaldaryn onlaın saýdalaıtyn aqparattyq alań qurylady

NUR-SULTAN. QazAqparat – Qazaqstanda otandyq qurylys materıaldaryn onlaın saýdalaıtyn «Marketpleıs» aqparattyq alańy qurylady. Bul týraly Úkimet otyrysynda Indýstrııa jáne ınfraqurylymdyq damý mınıstri Beıbit Atamqulov málim etti, dep habarlaıdy QazAqparat tilshisi.

«Ónim qunyn tómendetý maqsatynda biz otandyq qurylys materıaldaryn onlaın saýdalaıtyn «Marketpleıs» arnaıy aqparattyq alańyn qurýdy qarastyryp jatyrmyz. Atalǵan onlaın portal kompıýter tehnologııalaryn qoldana otyryp, naqty ýaqyt rejıminde ár nysannyń qurylysyna monıtorıng jasaýǵa jáne ákimdikterdiń qarajatty ıgerýine múmkindik beredi. Bul materıaldar qunyn 15%-ǵa tómendetýge jol ashyp, qurylys materıaldary naryǵynyń ashyqtyǵyn qamtamasyz etedi», - dedi Beıbit Atamqulov.

Mınıstrdiń aıtýynsha memlekettiń qoldaýymen onlaın alań qurylys materıaldaryn belgilengen quny boıynsha satýǵa múmkindik beredi.

Eske sala ketsek buǵan deıin Beıbit Atamqulov qurylys ındýstrııasynyń damýyn tejep otyrǵan faktorlardy ataǵan bolatyn.