Otandyq kompanııalardyń múgedek jandarǵa qol ushyn bere bastaýy el ekonomıkasynyń órleı bastaǵanyn kórsetedi - S.Jumanáli
ALMATY. 26 shilde. QazAqparat /Ádilet Musahaev/ - Búgingi kúni elimizdiń ekonomıkasy alǵa jyljyp, úlken jetistikke jetkenin "Almaty GazInjınırıng" kompanııasy qalalyq múgedekter uıymyna jáne úsh avtokólikti syıǵa tartýymen ańǵartyp otyr.
Bul jaıynda búgin Almaty qalasy Eńbekpen qamtý jáne áleýmettik baǵdarlamalar departamenti dırektorynyń orynbasary mindetin atqarýshy Sáken Jumanáli avtokólikterdi tabystaý saltanaty barysynda aıtty.
S.Jumanáli osydan on jyl buryn múmkindikteri shekteýli jandarǵa qazaqstandyq kompanııalardyń kómek kórsetýine shaqyrǵandyǵyn, alaıda olardyń múmkindikteri shekteýli bolǵandyǵyn aıtady. «Ol kezde kóbinde qaladaǵy halyqaralyq uıymdarǵa úmit artatynbyz. Búgingi jaǵdaı elimizdiń azamattarynyń sanasy ósip, Memleket basshynyń saıasatyn qoldap, sol turǵyda atqarǵan eńbekteriniń nátıjesi dep bilemin», - deıdi S.Jumanáli.
Sonymen qatar ol osy jyldyń 16 mamyrynan beri qalamyzda múgedek jandar úshin "Inva" taksıi jumys istep jatqandyǵyn jetkizdi. Qazirgi ýaqytta arnaıy jabdyqtalǵan 6 shaǵyn avtobýs jumys istep tursa, taǵy ekeýi qosymsha qorda tur eken. Osy kúnge deıin bul avtobýstar 2 myńnan asa baǵytta júrginshilerdi tasymaldap úlgergen.
"Qala bıýdjetinen múgedek jandardyń qajettiligin óteý úshin bıyl 19 mıllıon teńge bólinse, kelesi jylǵa 60 mıllıon teńgege tapsyrys berdik. Qalamyzda qazir 1500-nan asa múgedek jandar bar. Bul «Inva» taksıler tek 1-toptaǵy múgedekterdi qalanyń kez-kelgen jerine tegin aparady. Basqa toptaǵy múgedekterdiń qalalyq qoǵamdyq kólikterde júrip turýyna jeńildikter jasalǵan", - dep atap ótti atalǵan departament dırektorynyń orynbasary.
