Otandyq kompanııalar sheteldik mamanǵa nege qumar
ASTANA. QazAqparat - Qazaqstandyq kompanııalar sheteldik mamandardy shaqyryp, solarǵa jumys berýge nelikten qumar? QazAqparat tilshisine suhbat bergen «Optimum Recruitment&Executive Search» rekrýtıngtik agenttiktiń dırektory Dına Ábilhojına dál osy suraqqa jaýap berdi.
«Egerde ekspattar (sheteldik mamandarǵa arnalǵan sleng ataý) Qazaqstanǵa jumys isteýge keler bolsa, onda olar joǵary top bos jumys oryndaryn ıelenedi. Ol marketıng jónindegi dırektor nemese kompanııalardyń, qarjy ınstıtýttary ókildikteriniń, keńseleriniń basshylary bolýy múmkin. Negizinen bıznesti qalyptastyratyn strategııalyq pozıtsııalarǵa ekspattar shaqyrylady. Al tómen qyzmetterge olardy tartýdyń esh qajettigi de joq», - dedi Ábilhojına.
Onyń sózine qaraǵanda, búginde qazaqstandyq kompanııalar ártúrli elderdiń mamandaryn qyzmetke shaqyrady. Degenmen, olar orys tiline jetik Ýkraına men Reseı mamandaryna kóbine basymdyq bergenimen alys shet elderden keletin ekspattar bar.
«Negizinen olar ІT salasynyń mamandary. ıAǵnı, olar belgili bir júıeniń túrli modýlderine qatysty keńesshileri bolýy yqtımal. Al olarǵa basymdyq berilýiniń basty sebebi shetelde bul naryq óte jaqsy damyǵan ári belgili bir kompanııanyń, halyqaralyq keńseniń jumysy durys jolǵa qoıylǵan. Sol sebepti olardyń mamandarynyń bizge qaraǵanda sheteldik tájirıbe alýǵa múmkinshilikteri mol. Máselen, ol Reseıde jumys istep, keıinnen Germanııaǵa jáne odan ary halyqaralyq taǵaıyndaýmen ilgerileýi múmkin. ıAǵnı, adam bir kompanııanyń qurylymynda túrli elderde jumys jasaı alady», - dep túsindirdi ol.
Agenttik basshysynyń aıtýynsha, Qazaqstanda mundaı múmkinshilik usynatyn kompanııalar tym az.
«Al shetelde bul yntalandyrýdyń mańyzdy qozǵaýshy kúshi sanalady. Sol sebepti bilimi myqty «bolashaqtyq» bolsa da, tildi keremet meńgerse de tek Qazaqstanda ǵana jumys istegen adamnyń halyqaralyq jumys tájirıbesi kemshin túsedi. Degenmen, bizdiń mamandar sheteldikterden kem emes. Tipti, olardan asyp túsetinderi de bar», - dedi Ábilhojına.
Sonymen qatar ol búgingi kúni elimizdegi ekspattardyń sany kemip kele jatqandyǵyn aıtty.
