Otandyq kınogerler Londonda úzdik dep tanyldy
Festıvaldiń bas júldesin Marına Qonarovanyń «Uly dala zary» fılmi jeńip aldy. Kórkem dúnıe asharshylyq kezinde qyrylǵan qazaq halqynyń shynaıy tarıhı oqıǵalary týraly syr shertedi. Gran-Prı úshin Reseı, Armenııa jáne Ulybrıtanııadan usynylǵan fılmder de talasty. Qazaqstandyq ónim sarapshylar men kórermenderdiń joǵary baǵasyna ıe boldy.
«Fılm avtorlary 100 jyldan astam ýaqyt buryn qazaq halqy ótkergen tragedııalaryn keıipkerler arqyly shynaıy ári sheber jetkizýge tyrysqan. Bul oqıǵalar qazaq halqyn áli de mazalaıtyny ańǵarylyp tur», deıdi bolgarııalyq qazylar alqasynyń múshesi Natalı Vong.
Budan bólek Jorabek Musabaevtyń «Úı» fılmine jazǵan stsenarııi «Orys tilindegi úzdik stsenarıı» dep tanyldy. Al Saıd Áshirbaev «Úzdik jas rejısser» atalymy boıynsha marapattaldy. Jeńimpazdar qatarynda áriptesimiz, Habar telearnasynyń rejısseri Aqbóbek Tóljanova da bar. Ol Ábish Kekilbaıuly shyǵarmasynyń jelisi boıynsha túsirilgen «Uıqydaǵy arýdyń oıanýy» atty derekti fılmi úshin «Kórermender kózaıymy» atalymyn qanjyǵalady.
Festıvaldiń maqsaty - Eýrazııalyq aımaqtyń kınematografııasyn damytý, aǵylshyn tildi keńistikte ilgeriletý jáne eýrazııalyq kınoındýstrııa ókilderin búkil álem mamandarymen tanystyrý. Bıyl ol besinshi ret uıymdastyrylyp otyr.
«Eki jyl buryn tanylǵan festıval jeńimpazdarynyń isi ilgerilep, budan da basqa baıqaýlarda top jardy. Fılmderi Gollıvýdqa jol tartyp, Amerıka ekrandarynda kórsetilgenderi de bar. Qazaq kıno ónimderiniń jańa naryqtardy ıgeretin kezi jetti dep oılaımyn. Olardy kórgen kórermenniń Uly dala eliniń ásem tabıǵatyn tamashalaý úshin Qazaqstanǵa barary haq», deıdi Eýrazııalyq shyǵarmashylyq gıldııasynyń tóraǵasy Garet Stamp.
Marapattaý saltanatynyń syıly qonaqtary qatarynda Londondaǵy Haverıng aýdanynyń meri, TMD memleketteri elshilikteriniń ókilderi boldy. Festıval uıymdastyrýshylary óner súıer qaýymdy jýyrda Býrabaıda ótetin qysqametrajdy kınonyń ekinshi halyqaralyq baıqaýyna shaqyrdy.
