Otandyq kásiporyndarǵa mys symyn naryqtyq baǵamen alýǵa múmkindik beriledi

ASTANA. QazAqparat - QR Indýstrııa jáne ınfraqurylymdyq damý mınıstrliginde mys metalyn óńdeıtin kásiporyndardy otandyq shıkizatpen qamtamasyz etýge arnalǵan úshjaqty kelisimge qol qoıyldy. Bul kelisim IIDM, «Qazaqmys» korporatsııasy» JShS jáne óńdeý ónerkásip kásiporyndary arasynda jasaldy, dep habarlaıdy QazAqparat.

Bul rette Memleket basshysy Q.Toqaev Qazaqstan halqyna arnaǵan Joldaýynda otandyq óńdeý ónerkásibin qajetti shıkizatpen tolyqqandy qamtý máselesine erekshe basymdyq bergenin aıta ketken oryndy. Al joǵaryda atalǵan kelisim múddeli taraptardyń uzaqmerzimdi, tıimdi ári jemisti yntymaqtastyqty nyǵaıtyp damytýǵa, kásipkerlik qyzmetti qoldaýǵa, sondaı-aq ádil, ashyq jáne ózara syılastyq qaǵıdattary negizinde elimizdegi óńdeý ónerkásibin órkendetýge baǵyttalyp otyr.

Soǵan sáıkes «Qazaqmys» korporatsııasy birqatar óńdeýshi kásiporyndy tolyq kólemde jáne tómendetilgen baǵamen qajetti shıkizatpen qamtamasyz etpek. Onyń ishinde «Úlbi metallýrgııa zaýyty» AQ, «Qazelektromash» JShS, Alageum Cable Products JShS, HARMONY CABLE JShS, K. AZTEL JShS, Trans Cable JShS, «Aqnur kabel» JShS, «Qazenergo-1» JShS, «Qazenergokabel» AQ, «OK Oral Kabel» JShS, «Svetotehnıka-1» JShS, «Qazortalyqelektrsymy» JShS, «Taldyqorǵankabel» JShS jáne «Elektrokomplekt-1» JShS bar. Osy arqyly óndiris oryndaryna mys symyn naryqtyq baǵamen satyp alýǵa jol ashylady.

Óz kezeginde otandyq kompanııalar joǵary sapadaǵy óńdelgen ónim shyǵarýdy jolǵa qoıyp, óndiris kólemin ulǵaıtýǵa, sondaı-aq alǵan shıkizattyń barlyǵyn óńdeýge tıis. Osy qolǵa alynǵan amal Qazaqstandaǵy óńdeý ónerkásibiniń júktemesin arttyrýǵa oń serpin beredi dep boljanyp otyr.