Otandyq kásiporyndardyń tapsyrysymen qosymsha 10 myń maman daıarlanady

ASTANA. QazAqparat – Qazaqstandyq kolledjder kásiporyndardan qosymsha 10 myń maman daıarlaýǵa tapsyrys aldy. Bul týraly Oqý-aǵartý birinshi vıtse-mınıstri Sholpan Karınova málim etti, dep habarlaıdy QazAqparat tilshisi.

«Bizdiń mınıstrlik jergilikti ákimdiktermen birlesip kásiporyndardyń tapsyrysy boıynsha kadrlardy maqsatty daıarlaýdy bastady. Ol úshin kásiporyn kolledjben maqsatty maman daıarlaý týraly shart jasasady. Bul jerde kásiporyn praktıkadan, taǵylymdamadan ótýin uıymdastyrý jáne túlekterdi odan ári jumysqa ornalastyrý boıynsha mindettemeni óz moınyna alady. Sonymen qatar, bilim berý baǵdarlamasy jumys berýshiniń talabyna saı jańartylyp, dýaldy oqytý uıymdastyrylady», - dedi Sholpan Karınova OKQ-de ótken brıfıngide.

Mınıstr orynbasarynyń málimdeýinshe, bul kolledj túlekteriniń jumyspen qamtylýyna yqpal etedi.

«Nátıjesinde túlekter kásiporyndarda 100% jumysqa ornalasý múmkúndigine ıe bolady. Osy oqý jylynda kásiporyndardyń tapsyrysy boıynsha 10 myń stýdent qabyldansa, kelesi oqý jylynda qosymsha 10 myń túlekti qabyldaý josparlanyp otyr», - deıdi ol.

Buǵan deıin Sholpan Karınova kolledj túlekterine dıplommen qosymsha maman retindegi biliktiligi deńgeıin anyqtaıtyn karta beriletini týraly aıtqan edi.