Otandyq kásipkerlerde jańa naryqtardy ıgerýge qulshynys joq - sarapshy
ASTANA. QazAqparat - Búginde elimizde eksportty ulǵaıtýǵa arnalǵan barlyq sharalar qolǵa alynyp jatyr. Damyǵan memleketterde qolǵa alynatyn sharalar bizde de jasalýda.
Alaıda naqty nátıje áli baıqalmaıdy. Ekporttyń kólemi tómendep keledi, dep xabarlaıdy QazAqparat tilshisi.
"Qazaqstanda óndiris oryndary tolyq jumys istemeıdi, tipti bos turǵan kásiporyndar da bar. Eksportty arttyrýǵa arnalǵan memlekettik qoldaý sharalary barshylyq. Biz damyǵan elderde qolǵa alynǵan sharalardy atqaryp kelemiz. Sonyń ishinde eksporttyq saqtandyrý, qarjylyq qoldaý, san alýan roýd-shoýlar, salyqtyq jeńildikter jáne taǵysyn taǵy. Soǵan qaramastan, Qazaqstannyń eksporty azaıyp keledi", - dedi QR Tuńǵysh Prezıdenti - Elbasy qory janyndaǵy Álemdik ekonomıka jáne saıasat ınstıtýtynyń dırektory Erjan Saltybaev búgin eksportty arttyrýǵa arnalǵan jıynda.
Instıtýt basshysynyń oıynsha, qazirgi kezde otandyq kásipkerlerge jańa naryqtarǵa shyǵý qajet. Sebebi burynǵy naryqtar birtindep jabylyp keledi. "Alysqa barmaı-aq qoıaıyq, búginde bizdiń alkogol óndirýshilerimiz kórshi elderde san alýan kedergilerge tap bolyp jatady. Keden, salyq jáne taǵy basqa tosqaýyldar barshylyq. Sonyń saldarynan Qazaqstannyń eksporty tómendep keledi. Al otandyq kásipkerler dástúrli naryqtarǵa úırenip, burynǵy psıxologııaǵa baılanyp otyr. Sonyń saldarynan jańa naryqtardy ıgerýge qulshynys joq", - dep atap kórsetti Saltybaev.
Onyń aıtýynsha, Vetnam, Indonezııa, Taıland, Úndistan, Bangladesh sııaqty Oństústik-Shyǵys Azııa elderine shyǵý qajet. Óıtkeni ol jaqta resýrstarǵa da, taýarlarǵa da suranys bar. "Nurly jol" baǵdarlamasy aıasynda jasalyp jatqan ınfraqurylymdy barynsha paıdalanyp, Ońtústik Kavkazǵa, Túrkııa men Taıaý Shyǵysqa, odan ary qaraı Eýropaǵa shyǵýǵa bolady. Onsyz ekportymyzdy eki esege arttyrýǵa arnalǵan Prezıdenttiń tapsyrmasyn oryndaý múmkin emes.
Aıta keteıik, búginde QR Ulttyq ekonomıka mınıstrligi Qazaqstannyń 2025 jylǵa deıingi Strategııalyq josparyn daıyndap qoıdy. Budan bólek, eksporttyq strategııanyń jobasy da ázir. Jaqyn arada ınvestıtsııalyq strategııanyń jobasy da daıyn bolady. "Osyǵan baılanysty sarapshylar qaýymdastyǵyna atalǵan qujattardy jan-jaqty zerdelep shyqqan jón. Sol kezde bárimiz naqty qaı baǵytqa bet alǵanymyzdy bilip, ol baǵyttyń durys ıa burys ekenin der kezinde anyqtaı alamyz", - deıdi QR Prezıdenti Ákimshiliginiń Strategııalyq ázirleý men taldaý ortalyǵy meńgerýshisiniń orynbasary Oljas Joraev.
