Otandyq qant óndirisin damytý boıynsha salalyq baǵdarlama ázirlenýde
ASTANA. QazAqparat - Otandyq qant óndirisin damytý boıynsha salalyq baǵdarlama ázirlenýde. Bul týraly búgin Úkimettiń selektorlyq rejimdegi otyrysynda áleýmettik mańyzy bar azyq-túlik taýarlaryna baǵalardy turaqtandyrý jóninde baıandaǵan QR Aýyl sharýashylyǵy birinshi vıtse-mınıstri Arman Evnıev aıtty, dep habarlaıdy QazAqparat tilshisi.
«Aýyl sharýashylyǵy mınıstrligi oblystardyń, Astana, Almaty jáne Shymkent qalalarynyń ákimdikterimen birlese áleýmettik mańyzy bar azyq-túlik taýarlarynyń baǵalaryn turaqtandyrý úshin naqty ister atqarylýda. Oblystarda azyq-túlik taýarlarynyń óńirlik turaqtandyrý qorlaryn qalyptastyrý júrgiziledi. 2018 jyldyń 20 qyrkúıegindegi jaǵdaı boıynsha turaqtandyrý qorlaryndaǵy taýarlyq ınterventsııalar júrgizýge arnalǵan qor 4,5 myń tonnany, almastyrýǵa berilgender jáne jaýapty saqtaýǵa berilgender 3,8 myń tonnany qurady. Qolda bar 4,5 myń tonnanyń 2,16 myń tonnasy qant, 0,71 myń tonnasy kúnbaǵys maıy, 0,67 myń tonnasy 1 suryptaǵy bıdaı uny, 0,577 myń tonnasy- qaraqumyq jarmasy jáne 0,354 myń tonnasy makaron ónimderi», - dedi Arman Evnıev.
Sonymen qatar vıtse-mıınstrdiń dereginshe, áleýmettik-kásipkerlik korporatsııalardyń esep-shottarynda 5,1 mlrd teńge qarajat bar. Qarajattardyń eń kóp mólsheri Astana qalasynda - 1 553 mln teńge, Túrkistan oblysynda - 727 mln teńge, Almaty qalasynda - 363 mln teńge, Qostanaı oblysynda - 373 mln teńge jáne Jambyl oblysynda 390 mln teńgeni quraıdy.
«Qant tóńiregindegi qalyptasqan jaǵdaıǵa baılanysty Aýyl sharýashylyǵy mınıstrligimen qolda bar qarajattardy óńirlerge 10 myń tonnaǵa deıin qant satyp alýǵa jumsaý usynylady. Sonymen qatar mınıstrlik qant baǵasyn turaqtandyrýdyń júıelik sharasy retinde otandyq qant óndirisin damytý boıynsha salalyq baǵdarlama ázirleýde. Onda egistik alańdaryn keńeıtý, qant qyzylshasynyń tuqymyn damytý jáne shyǵymyn kóbeıtý, qant qyzylshasyn óńdeýge arnalǵan aýyl sharýashylyǵy tehnıkasyn satyp alýǵa járdemdesý jáne otandyq qyzylsha shıkizatynan qant óndirý zaýyttaryn salýdy yntalandyrý sııaqty sharalar kózdeledi», - dedi ol.
