Otandyq ǵalymdarǵa jańa syılyqtar taǵaıyndalady

ASTANA. QazAqparat – Otandyq ǵalymdarǵa úzdik ǵylymı jumystary men zertteý salasyndaǵy zor jetistikteri úshin jańa syılyqtar men memlekettik stıpendııalar taǵaıyndalmaq. Bul týraly «Ashyq» NQA portalynda jarııalanǵan Ǵylym jáne joǵary bilim mınıstriniń tıisti buıryq-jobasynda jazylǵan, dep habaraıdy QazAqparat tilshisi.

Vedomstvo basshysynyń buıryǵyna saı, endi ǵalymdarǵa jyl saıyn myna syılyqtar taǵaıyndalady:

- jaratylystaný ǵylymdary salasyndaǵy úzdik ǵylymı zertteý úshin Q.I.Sátbaev atyndaǵy 1 syılyq;

- gýmanıtarııa ǵylymdary salasyndaǵy úzdik ǵylymı zertteý úshin Sh.Sh.Ýálıhanov atyndaǵy 1 syılyq;

- agrarlyq ǵylym salasyndaǵy úzdik ǵylymı zertteý men jumys úshin A.I.Baraev atyndaǵy 3 syılyq;

- pedagogıka salasyndaǵy úzdik ǵylymı zertteý men jumys úshin Y.Altynsarın atyndaǵy 1 syılyq;

- túrkologııa salasyndaǵy asa zor jetistikteri úshin Kúltegin atyndaǵy 1 syılyq;

- jaratylystaný ǵylymdary salasyndaǵy úzdik jumysy úshin jas ǵalymdarǵa arnalǵan D.A.Qonaev atyndaǵy 1 syılyq;

- gýmanıtarııa ǵylymdary salasyndaǵy úzdik jumys úshin jas ǵalymdarǵa arnalǵan M.O.Áýezov atyndaǵy 1 syılyq.

Sonymen qosa, 75 memlekettik ǵylymı stıpendııa taǵaıyndalady. Onyń 50-i jasy 35-ke deıingi talantty jas ǵalymdarǵa beriledi.

«Jyl saıynǵy syılyqtardy jáne memlekettik ǵylymı stıpendııany alýǵa úzdik ǵylymı zertteýleri men jumystary, ǵylym salasyndaǵy asa zor jetistikteri úshin ǵylymı qyzmetkerler usynylýy múmkin. Syılyqtardy alý úshin jumystar usyný quqyǵy menshik nysanyna qaramastan QR ǵylymı uıymdarynyń jáne joǵary nemese joǵary oqý ornynan keıingi bilim berý uıymdarynyń konsýltatıvtik-keńesshi organdaryna jiberiledi. Syılyq alýǵa jeke avtorlar, sondaı-aq sany 5 adamnan aspaıtyn avtorlar ujymynyń jumystary usynylýy múmkin. Ár avtor jáne avtorlar ujymy konkýrsqa tek 1 jumys usynýǵa quqyly. Buryn respýblıkalyq bıýdjet qarajatynan tólenetin syılyqtarǵa ıe bolǵan jumystar osy syılyqtardy alý konkýrsyna qatysýǵa jiberilmeıdi. Syılyqqa alý úshin jumys 2 retten artyq usynylmaıdy. Ujymdyq jumystardyń avtorlaryna syılyqtyń aqshalaı bóligi teń úlespen tólenedi», - delingen qujatta.

Qujattardy qaraý jáne syılyqtardy taǵaıyndaý boıynsha konkýrstyq komıssııa qurylady jáne sonyń sheshimi negizinde jeńimpazdar anyqtalady.

Buıryq jobasy 18 sáýirge deıin kópshilik talqylaýda bolady.