Otandyq ǵalymdar tapqan dári denedegi synyq pen kúıikti tez jazady
ASTANA. QazAqparat - Nazarbaev Ýnıversıtettiń ǵalymdary medıtsına salasy úshin úlken jetistik bolatyn dári oılap tapty. Onyń biri - «aqyldy» polımer. Ol synǵan súıektiń jazylýyn jedeldetedi. Al ekinshi ónim - «aqyldy» tańǵysh. Bul ónimdi kúıik shalǵanda jáne oıyq jara paıda bolǵanda paıdalanýǵa bolady, dep jazady «Egemen Qazaqstan» gazeti búgingi sanynda.
- Biz adam súıegi synǵan kezde jazylýdy tezdetetin júıege qol jetkizdik. Bizdiń ǵalymdar Pıttsbýrg ýnıversıtetimen birigip, adam aǵzasyndaǵy dińgek jáne súıek jasýshalaryn biriktiretin dári oılap tapty. Zertteý jumystarynyń nátıjesinde osy polımerdi qoldanǵannan keıin synǵan súıektiń jazylý jyldamdyǵy 30 paıyzǵa artqan. Qazirgi tańda biz klınıkalyq zertteýaldy satysynda turmyz. Aldaǵy ýaqytta biz jasaǵan «aqyldy» polımerdiń qanshalyqty deńgeıde qaýipsiz ekenin anyqtaýymyz qajet. Eger jumysymyz sátti shyqsa, ǵalymdar klınıkalyq zertteýdi bastaıdy, - deıdi Nazarbaev Ýnıersıtettiń bıoınjenerııa jáne regeneratsııalyq medıtsına zerthanasynyń ǵylymı jetekshisi Sholpan Asqarova. Ol sondaı-aq otandyq ǵalymdardyń bul jetistikpen shektelip qalmaı, jańa medıtsınalyq ónimdi qurastyryp jatqanyn da aıtty.
- Ári biz «aqyldy» tańǵyshty ázirlep jatyrmyz. Bul tańǵysh gelden jasalady. Atalǵan zat suıyq kúıde bolady. Ol terige jaǵylǵan kezde qatyp qalady. Bul ádis kúıik shalǵan kezde jáne oıyq jarany emdeýge (ıazva) paıdalanylady. Ǵalymdar jasaǵan ónim qazirgi tańda klınıkalyq zertteýaldy satysynda tur. Aldaǵy jyldary bul ónimderdi Qazaqstanda shyǵarýdy josparlap otyrmyz, - deıdi ol.
Aıta keteıik, Nazarbaev Ýnıversıtette National Laboratory Astana-nyń bastaýymen «Regeneratıvti medıtsına jáne sapaly uzaq ómir súrý» atty IV Halyqaralyq ǵylymı konferentsııa ótken-di. Al otandyq ǵalymdardyń ınnovatsııalyq jetistikteri osy sharada keńinen aıtyldy.
