Otandyq fılmderdi offlaın rejımde kórýge bolady
«Qazaqstan» RTRK» AQ basqarma tóraǵasy Erlan Qarın «Kinomax» mobıldik qosymshasyn tanystyrdy.
«Qazir tsıfrlandyrý dáýiri, sondyqtan kórermenderdiń kóbisi álýmettik jelilerde, túrli ınternet saıttarda ózderine qyzyqty da qajetti kontentti taýyp, tamashalaı alady. Tańdaý kóp, sondyqtan tanymal trendterge sáıkes keletin kontent jasaýshylar sany kúnnen kúnge artyp keledi. Básekelestiktiń qarqyny basym. Osy oraıda«Qazaqstan» korporatsııasy zaman talabyna saı jumys jasaýda. Ótken jyly «Qazaqstan tv» mobıldik qosymshasyn iske qosqan bolatynbyz. Bul qazirgi ýaqytta Qazaqstannyń telenaryǵyndaǵy eń úzdik, eń tanymal mobıldik qosymshalardyń biri. Jarty jyldyń ishinde bul qosymshany jarty mıllıonnan astam qoldanýshy uıaly telefondaryna júktep aldy», - deıdi E.Qarın OKQ-da ótken baspasóz máslıhatynda.
Onyń aıtýynsha, jalpy korporatsııaǵa qarasty medıa kózderdiń áleýmettik jelilerdegi jeke akkaýnttarda jazylýshylar sany 1 599 762 adamǵa jetken.
«Al «Qazaqstan tv» Youtube arnasynyń jazylýshylar sany mıllıonǵa jetip otyr. Sondyqtan qazirgi sátte elimizdegi memlekettik telearnalardyń ishinde eń aldyńǵy orynda tur. Maýsym aıynda «Youtub-tyń altyn batyrmasyn» ıelenýimiz ábden múmkin. Osynyń bári de «Qazaqstan» RTRK qazirgi ýaqytta ınternettegi basymdylyǵyn eskere otyryp, aýqymdy jumysymyzdy kórsetip otyr», - deıdi Erlan Qarın.
Sózin jalǵastyra kele Erlan Qarın tyń mobıldik qosymsha iske qosylǵanyn jarııa etti.
«Búgin Sizderdiń nazarlaryńyzǵa usynyp otyrǵan «Kinomax» mobıldi qosymshasy - bul Andriod jáne IOS platformalarynda táýligine 24 saǵat boıy qoljetimdi vıdeoservıs. Osy qosymsha arqyly otandyq telehıkaıalar, kórkem jáne derekti fılmder, anımatsııalyq fılmderdi onlaın rejımmen qatar, offlaın rejımde de kórýge bolady. Qosymshada:«Kinomax-tegi jańa fılmder» degen aıdarda jańadan engizilgen kınotýyndylar jınalǵan. «Osy aptada tanymal» bóliminde qoldanýshylardyń arasynda tanymal, joǵary baǵalanǵan kontent, al «Dál qazir kórýde» - sol sátte qoldanýshylardyń tamashalap jatqan kontentin kóre alasyzdar. Sonymen qatar, kishkentaı búldirshinder úshin «Balapan» rejımi qarastyrylǵan. Bul toptamada «Balapan» telearnasynyń baǵdarlamalary, anımatsııalyq fılmder usynylǵan», - deıdi ol.
Basqarma tóraǵasynyń aıtýynsha, bul vıdeoservıs otandyq kontentti damytýmen qatar aýdıtorııa suranysyna saı sapaly jobalardy usyný maqsatynda iske asyrylǵan. Osy arqyly teleradıokorporatsııa basshylyǵy kórermenderge ne qyzyqty ekenin eskerip, básekege qabiletti jáne túrli janrlardaǵy kontentti usynýdy kózdep otyr.
