Otandyq fermerlerdiń ónimin saýdalaıtyn «Agro Labs» platformasy ázirlenip jatyr
NUR-SULTAN. QazAqparat - Fermerlerdiń otandyq ónimdi básekege qabiletti baǵamen satýy úshin «Agro Labs» platformasy ázirlenip jatyr. Bul týraly búgin Úkimet otyrysynda QR Saýda jáne ıntegratsııa mınıstri Baqyt Sultanov aıtty, dep habarlaıdy QazAqparat tilshisi.
«Búginde naryqta shamamen 13 damýshy qazaqstandyq saýda alańy jumys isteıdi. Kaspi.kz, flip.kz, chocofamily, mechta.kz basqa da marketpleısterde taýarlar men qyzmetterdiń shamamen 20 sanaty bar. Azyq-túlik saýdasyn damytý maqsatynda «Onay Bazar» jáne «HHappyFood.kz» elektrondyq platformalaryn damytýǵa qoldaý kórsetildi. Olar tutynýshyǵa úıden shyqpaı-aq taýar satyp alýǵa múmkindik beredi. Máselen, bazardaǵy sábiz 100 teńgeden satylsa, Onay Bazarda 85 teńge ǵana turady. Fermerlerdiń otandyq ónimdi básekege qabiletti baǵamen satýy úshin «Agro Labs» platformasy ázirlenip jatyr. Jalpy, saýdany tsıfrlandyrý azyq-túlik baǵasyn tómendetýge, sondaı-aq baǵa belgileýdi ashyq etýge múmkindik beredi dep oılaımyz, - dedi Baqyt Sultanov.
Sonymen qatar ol qoǵamdyq saýdany elektrondyq formatqa aýystyrý, azyq-túlik taýarlarynyń baǵasyn baqylaý maqsatynda mınıstrliktiń qoldaýymen «BTS Digital» kompanııasy «PRICE SCANNER» qosymshasyn ázirlep jatqanyn aıtty.
«Munan bólek, mınıstrlik tutynýshylardyń quqyqtaryn qorǵaý týraly jańa zań jobasy aıasynda «bir tereze» qaǵıdaty boıynsha shaǵymdardy qabyldaýdyń Biryńǵaı aqparattyq júıesin qurýdy kózdep otyr. Bul júıe tutynýshyǵa ınternet arqyly shaǵym berýge jáne óziniń buzylǵan quqyqtaryn qalpyna keltirýge múmkindik beredi«, - dedi mınıstr.
