«Otandyq dıplomatııa ulttyq múddelerdi qorǵaý qyzmetinde» - respýblıkalyq basylymdarǵa sholý

Memleket basshysy Nursultan Ábishuly Nazarbaev ótkizgen tikeleı jeli kezinde Syrtqy ister mınıstrligine qatysty 300-den astam suraq kelip tústi. Saýaldar elimizdiń syrtqy saıasatynyń negizgi baǵyttary, Eýropadaǵy Qaýipsizdik jáne yntymaqtastyq uıymyna tóraǵalyqtyń mán-mańyzy, kórshiles memlekettermen qarym-qatynastar sııaqty baǵyttardy qamtıdy. Osy saýaldarǵa QR Memlekettik hatshysy - Syrtqy ister mınıstri Qanat Saýdabaev «Egemen Qazaqstan» gazetiniń senbilik sany arqyly jaýap berdi. Jaýaptar «Otandyq dıplomatııa ulttyq múddelerdi qorǵaý qyzmetinde» degen taqyryppen berilgen.

 Keshe QR Premer-Mınıstri Kárim Másimov bastaǵan elimizdiń delegatsııasy  Sankt-Peterbor qalasyna bardy. Onda Eýrazııalyq ekonomıkalyq qoǵamdastyqtyń (EýrAzEQ) Memleketaralyq keńesine múshe elder úkimet basshylarynyń 25-shi otyrysy jáne Kedendik odaqtyń Memleketaralyq keńesiniń úkimet basshylary deńgeıindegi otyrysy bolyp ótti. Osy aıtýly jıynǵa oraı «Egemen Qazaqstan» gazetinde «Ortaq múdde tuǵyrly áleýetterge bastaıdy» degen taqyryppen maqala jaryq kórdi. Basylymnyń jazýynsha, Sankt-Peterbor qalasyndaǵy Úkimet basshylarynyń kezekti otyrysy barysynda «Inno­vatsııalyq bıotehnologııa» atty EýrAzEQ-tyń memleketaralyq maq­satty baǵdarlamasy talqylanyp, be­kitilgen. Sonymen qatar Úkimet basshylary EýrAzEQ men Halyqaralyq damý qaýymdastyǵy arasyndaǵy Ortalyq Azııa­daǵy AQTQ dertine qarsy kúres jónin­degi jobany damytý maqsatyndaǵy grant týraly kelisimge ózgerister engizý jónindegi másele boıynsha da ortaq kelisimge kelgen.

 QR Premer-Mınıstriniń Reseıge sapary «Kazahstanskaıa pravda», «Lıter» basylymdarynyń nazarynan da tys qalmaǵan.

 «Egemen Qazaqstan» gazetinde QR Qorǵanys mınıstri   Ádilbek Jaqsybekovtiń «Qazaqstan Qarýly Kúshteri:  búgin jáne erteń» atty maqalasy jaryq kórdi. Maqala «Bir sózben aıtqanda, Joǵarǵy Bas Qolbasshynyń basshylyq etýi­men qýaty men utqyrlyǵy jo­ǵa­ry, halyqaralyq talaptarǵa saı kásibı Qarýly Kúshter qurý jó­nindegi is-sharalar jalǵasa bermek» dep qorytyndylanǵan. Jarııalanymdy basylymnyń senbilik sanynan tolyq oqı alasyzdar.

***
«Qazaqstanǵa keletin barlyq kınolar qazaqshalandyrylady». «Aıqyn» gazetiniń senbi kúngi sanynda jaryq kórgen maqalada 2012 jyldan bastap Qazaqstanǵa ákelinetin barlyq fılmder mindetti túrde tolyǵymen qazaq tiline aýdarylatyndyǵy aıtylǵan. Basylymnyń jazýynsha, bul týraly keshe Senatta Mádenıet jáne aqparat mınıstrliginiń jaýapty hatshysy Janna Qurmanǵalıeva jarııa etken. Bul talap «Mádenıet týraly» burynǵy zańnamany ózgertetin jańa zańnyń jobasyna engizilgen.

 Senattyń jalpy otyrysynda talqyǵa túsken osy máselege oraı «Egemen Qazaqstan», «Kazahstanskaıa pravda» gazetterinde de maqala jarııalanǵan.

 «Qazaqstan, Reseı jáne Belarýs elderi arasynda kedendik odaq qurý ıdeıasy osy kúnge deıin ábden súzgiden ótip, aqyry júzege asatyn túri bar. Qarasha aıynyń sońynda atalmysh memleketter basshylary Mınskide bas qosyp, 2010 jyly shildeniń 1-inen bastap, Kedendik odaq sheńberinde ortaq kedendik keńistik qurýǵa kelisti», dep jazady «Aıqyn» gazeti. Basylym qaýzaǵan másele «Kedenniń esigi ashylsa, baǵa júgensiz ketpeı me?» degen taqyryppen berilgen.

 Osy basylymnyń senbilik nómirinde Respýblıkalyq ǵylymı-tájirıbelik halyq medıtsınasy ortalyǵynyń dırektory Sháken qajy Shyntaevpen aradaǵy suhbat jaryq kórdi. Ekeýara áńgime barysynda ol atalǵan ortalyqtyń qazirgi jaı-kúıi, shet elderdegi emshilerdiń jumys isteýine memlekettiń qanshalyqty kóńil aýdaratyndyǵy, elimizdegi áýlıe-ámbıeler týraly tuşymdy jaýap bergen.  «Halyq medıtsınasyn baqylaýdan shyǵaryp alý - qarapaıym jurt úshin qaýipti» degen taqyryppen berilgen suhbat barysynda Sh.Shyntaev «basqa dinge engen qazaqtardyń deni dýalanǵan. Olardy ıslam jolyna qaıta túsirý qıyndaý. Oılaý qabiletterinen aıyrý aldaǵy ýaqytta da qanatyn keń jaıyp, memleketke qater tóndirmes úshin barlyq emshilerdi bir ortalyqtan basqarǵan durys», depti.

***
Keshe elordadaǵy «Táýelsizdik» turǵyn úı kesheni paıdalanýǵa berilip, onyń úleskerleri kópten kútken páterleriniń kiltine ıe boldy. Qýanysh ıelerin quttyqtaýǵa Premer-Mınıstrdiń birinshi orynbasary Ómirzaq Shókeev pen Astana qalasynyń ákimi Imanǵalı Tasmaǵambetov qatysty. Osyǵan oraı «Astana aqshamy» gazetinde «Táýelsizdik» úıiniń turǵyndary» atty maqala jarııalandy. Basylymnyń jazýynsha, Ó.Shókeev Elbasy atynan  birneshe úleskerge páter kiltin tapsyrǵan.

 Elordalyq úleskerlerdiń jańa páterlerge ıe bolǵan qýanyshtaryna ortaqtasqan «Egemen Qazaqstan» gazeti «Úleskerler qýanyshy» degen taqyryppen maqala jarııalaǵan. Sonymen qatar «Kazahstanskaıa pravda» gazetinen de osy jaıtqa oraı tolyq maǵlumat alýǵa bolady.

 Úkimettiń Astanada medıtsınalyq kómek klasterin salý týraly qaýlysyna saı, ótken jyly elrodada Respýblıkalyq neırohırýrgııa ǵylymı ortalyǵy ashylyp, kóp keshikpeı neırooftalmolog qyzmeti engizilgen bolatyn. «Astana aqshamy» gazetiniń búgingi nómirinde jarııalanǵan «Eki kóz - eki juldyz mańdaıdaǵy» atty maqala osy mekemeniń jumysyna arnalǵan. Jarııalanymda osy ortalyqtyń bas dırektory, professor Serik Aqsholaqovtyń «Kóziniń aǵy aq, qarasy qara bolyp, jarqyrap tursa da, janar otynyń kemýi mıdaǵy kózdiń kórýine jaýap beretin júıke talshyqtarynyń birte-birte sónýinen, anyqtap aıtqanda, jansyzdanýynan týyndaıdy», degen sózi keltirilgen.

 «Keshe Astanada Azııa Olımpıadalyq keńesiniń Úılestirý komıteti óz jumysyn bastady», dep jazady «Kazahstanskaıa pravda» gazeti. Basylymnyń jazýynsha, 4 kún boıy AOK-niń ómir boıǵy qurmetti vıtse-prezıdenti Djıjong Veı bastaǵan delegatsııa Astanadaǵy jáne Almatydaǵy 7-shi Azııa oıyndarynyń sporttyq nysandarymen tanysady. Úılestirý komıteti sportshylar men sport delegattaryn ornalastyrý, tasymaldaý, medıtsınalyq qamtamasyz etý jáne dopıng-baqylaý máselelerin talqylaıdy. Sonymen qatar teleradıohabarlaryn taratýdy uıymdastyrý, eriktilerdiń jumysyn úılestirý, Azııadanyń mádenı baǵdarlamalary da qarastyrylady.

 Azııa Olımpıadalyq keńesi Úılestirý komıtetiniń otyrysyna oraı «Astana aqshamy» gazetinde de shaǵyn maqala bar.