Otandyq dárilik preparattar úlesin 40-50 paıyzǵa deıin jetkizýimiz kerek - Ardaq Tólegenova

ALMATY. Naýryzdyń 2-i. QazAqparat /Nazıra Eleýhan/ - Búgingi tańda elimizdegi dárilik zattarǵa qajettiliktiń 90 paıyzy sheteldik, tek 9-10 paıyzy otandyq ónim esebinen qanaǵattandyrylyp otyr.

Bul týraly búgin Almatyda «Dárilik zattardyń sapasy: memlekettik baqylaýdyń mehanızmi men joldaryn qamtamasyz etý» atty taqyrypta ótken ǵylymı semınarda farmatsevtıka ǵylymdarynyń doktory, professor, QR DSM Farmkomıtet dırektory Ardaq Tólegenova málim etti, dep habarlaıdy QazAqparat.

«Bul kórsetkish memlekettiń strategııalyq qaýipsizdigin qamtamasyz etý úshin Dúnıejúzilik Densaýlyq saqtaý uıymy (DDSU) usynǵan deńgeıden 20 paıyzǵa, ıaǵnı eki esege tómen. Sondyqtan, bizdi elimizdegi farmatsevtıkalyq óndiristiń kúrdeli jaǵdaıda turǵandyǵy alańdatpaı qoımaıdy. Óıtkeni, ózindik farmatsevtıkalyq óndiristi jandandyrý kez kelgen eldiń ulttyq qaýipsizdiginiń negizgi krıterıi bolyp tabylady. Biz, Elbasy atap ótkendeı, otandyq dárilik preparattar úlesin 40-50 paıyzǵa deıin jetkizýimiz kerek», dedi Ardaq Tólegenova.

Semınar barysynda Qazaqstan Respýblıkasyndaǵy otandyq óndiristegi dárilik zattardy jasaý men shyǵarý jónindegi jumystardyń erejeleri men perspektıvalary, sondaı-aq, Qazaqstannyń farmatsevtıkalyq naryǵyna syrttan kelip túsetin dárilik zattardyń sapasy týrasynda máseleler qarastyrylyp, qazaqstandyq dárilik ósimdik shıkizatyn dárilik zattar daıyndaıtyn perspektıvti negiz retinde paıdalaný máselesi sóz boldy.