Otandyq dárigerler 25 adamǵa jańa júrek syılady
ASTANA. QazAqparat - Qazaqstanda úmit pen kúdiktiń arasynda qarmanyp, fánıde ótken ár kúnin sanap júrgen adamdar bar. Olar óz aǵzasy isten shyǵyp, taǵdyry donorǵa baılanyp qalǵan naýqastar.
Astanadaǵy kardıologııalyq ortalyq Orta Azııada alǵash bolyp aǵzanyń basty organy - júrekti almastyrýǵa bel baılaǵan edi. Osydan týra 3 jyl buryn qazaqstandyq dárigerler alǵash ret naýqastyń júregin almastyryp, oǵan jańa ómir syılady. Bul - otandyq medıtsına tarıhynda jańa paraqtyń beti ashylǵan kún, dep habarlady www.24.kz.
Sodan beri aqhalattylar 25 adamǵa sátti ota jasap, ózgelerdiń álsiz júregine úmittiń óshpes otyn jaqty. Dál osy kardıologııalyq ortalyqta ómirden kúder úzip, úmiti óshken azamattar ekinshi márte dúnıe esigin ashty. 7 saǵatqa sozylǵan aýyr otadan keıin kózin ashqan 25-naýqas erteń aýrýhanadan shyǵyp, jańa júrekpen jańa ómirge aıaq baspaq. 42 jastaǵy Nurlan Qubdanovty úıinde kelinshegi men 3 balasy kútip otyr.
«Іnimniń júregi 2009 jyldan beri aýyratyn. Munda kelgen kezde ázer dem alyp júrdi. 1 aıdyń ishinde dárigerler inimdi aıaqqa turǵyzdy. Al donorlyq týraly buryn-sońdy oılamap edik. Endi ony nasıhattaýǵa kúsh salatyn bolamyn», - deıdi naýqastyń ápkesi Alýa Jubanııazova.
Al 3 jyl buryn taǵdyryn aqhalattylarǵa tapsyryp, pyshaqtyń astyna túsken alǵashqy naýqas qazir ómiriniń ár kúnine shattanyp, ózimen taǵdyrlas jandarǵa qoldaý kórsetip júr. Qazir olardyń úlken ortaq maqsaty bar. Álimbaı Tasbolatulynyń da jańa júrekpen júrgenine búgin týra 100 kún.
«Meniń keýdemde basqa adamnyń júregi soǵyp tur. Ol adamǵa myń da bir rahmet, kelisim bergen týystaryna rahmet aıtamyn. Bireýge ólim tilemeımiz. Biraq sol qaıtys bolǵan adam júrekke zárý adamdardyń ómirin qutqarady», - deıdi Álimbaı Tasbolatuly.
Al búginde Qazaqstan boıynsha 62 adam júregine donor kútip júr
«Qazir júrekti altaýy bizdiń ortalyqta kútip jatyr, bireýi jansaqtaý bóliminde, altaýy bólimshede. Qalǵany úılerinde. Donor kelgende biz shaqyryp alamyz. Qan toby, rezýs faktorymen sáıkes kelse, shaqyryp, osy jerde taǵy bıologııalyq synaq jasaımyz», deıdi Ulttyq ǵylymı kardıohırýrgııa ortalyǵy ońaltý bólimshesiniń meńgerýshisi Gúljan Myrzahmetova.
Mamandardyń aıtýynsha, oqys jaǵdaıda kóz jumǵan saý adamnyń aǵza músheleri kemi 4 naýqasqa ómir syılaı alady. Tek oǵan týystary kónse bolǵany.
