Otandyq dári-dármekter shetelde satyla ma
ASTANA. QazAqparat - Búginde dári-dármekterdi shyǵaratyn 6 otandyq kompanııa óz ónimderin shetelderge shyǵarady. Alaıda ol eksporttyń kórsetkishi 3 paıyzdan aspaı otyr, dep xabarlaıdy QazAqparat tilshisi.
«Máselen, biz sońǵy eki jyldyń ishinde dári-dármekterdi shyǵaratyn otandyq kompanııalardyń naryǵyn zerdelep kórdik. 15 kompanııanyń ishinde 6-ýy óz ónimderin eksportqa shyǵaryp otyr. Degenmen, olardyń úlesi nebári 3 paıyzdy quraıdy. Osyny eskerý kerek. Shynymen de, bul - úlken problema. Otandyq kásiporyndar osy máseleni sheshýge kúsh salýy qajet», - deıdi «SK-Farmatsııa» kompanııasynyń basshysy Nurjan Álibaev.
Onyń aıtýynsha, 2018 jyldan bastap Eýrazııalyq ekonomıkalyq odaqtyń dári-dármekter salasyndaǵy erejeleri kúshine enedi. Soǵan otandyq kásiporyndar daıyn bolýy shart. «Básekege qabiletti bolǵan jón. Ol úshin kórshi memleketterge shyǵyp, sol jaqtaǵy áriptestermen tyǵyz jumys jasaý qajet. Árıne, ónimniń sapasyn da jaqsartý kerek», - dep atap kórsetti N.Álipbaev.
Aıta keteıik, búgin Ortalyq kommýnıkatsııalar qyzmetinde ótken baspasóz máslıxatynda kompanııa basshysy kelesi jylǵa arnalǵan dári-dármekterdiń 95 paıyzy satyp alyndy dep málimdedi.
Onyń aıtýynsha, kelesi jyldyń dári-dármekterin aldyn ala satyp alýdyń arqasynda 11,7 mlrd. teńge únemdeldi. Kelesi jyldan bastap AITV-ǵa shaldyqqandardy tegin emdeý kólemi eki esege artady.
