Otandyq dári-dármek óndirýshilerdiń úlesi 30% artty – Premer-Mınıstr

NUR-SULTAN. QazAqparat – Bıyl farmatsevtıka ónerkásibinde – 34,1%, ınvestıtsııalarda 5,2% serpindi ósý baıqalady. Bul týraly Premer-Mınıstri Asqar Mamın aıtyp berdi, dep habarlaıdy QazAqparat tilshisi.

«Farmatsevtıka ónerkásibi ekonomıkanyń óte mańyzdy sektory jáne halyq ómiriniń qaýipsizdigi men densaýlyǵynyń negizi bolyp tabylady. Bıyl farmatsevtıka ónerkásibinde – 34,1%, ınvestıtsııalarda 5,2% serpindi ósý baıqalýda. Tanymal kompanııalardyń, onyń ishinde transulttyq kompanııalardyń qatysýymen 41 joba iske asyryldy, onyń ishinde antıbıotıkter, alkoloıdter, antıseptıkter shyǵaratyn jeke qorǵanysh quraldaryn jáne hırýrgııalyq maqta shyǵaratyn asa iri kompanııalar bar», - dedi Premer-Mınıstr búgingi Úkimet otyrysynda.

Bul sharalar arqyly Úkimet basshysy 5 myńnan astam jumys orny qurylǵanyn eske saldy.

«Dárilik zattar men medıtsınalyq buıymdardy satyp alýda otandyq óndirýshilerdiń úlesi 30% deıin ósti, bul kórsetkish turaqty ósip keledi. Dúnıejúzilik densaýlyq saqtaý uıymynyń pikirine sáıkes, eldiń dári-dármektik qaýipsizdigi ózindik farmatsevtıka óndirisi keminde 30% bolǵan jaǵdaıda qamtamasyz etiledi, al usynylyp otyrǵan Keshendi jospardyń arqasynda 2025 jylǵa qaraı óz óndirisimizdi naqty mánde 50% deıin jetkize alamyz», - dedi Asqar Mamın.

Aıta keteıik, Úkimet otyrysynda QR Indýstrııa jáne ınfraqurylymdyq damý mınıstri Beıbit Atamqulov «Farmatsevtıkalyq jáne medıtsınalyq ónerkásipti damytýdyń 2020-2025 jyldarǵa arnalǵan keshendi josparyn» tanystyrdy.

https://kaz.inform.kz/news/otandyk-farmacevtikaga-kanday-koldau-korsetiledi_a3702753