Otandyq dári-dármek óndirisi qarqyndy damýda
ASTANA. QazAqparat - Otandyq kompanııalar tıisti óndiristik praktıka (GMP) standarttaryna sáıkes jolǵa qoıýdy jáne konkýrsqa jarııalanǵan dárilik zattardyń 800 ataýynyń 561-in shyǵarýdy bastaýdy josparlap otyr.
Dári-dármektiń otandyq óndirisiniń mundaı kólemi sheteldik ónim berýshilerge táýeldi bolýdan saqtaıdy jáne ımporttyq ónimderdi otandyq preparattarmen almastyrýǵa múmkindik beredi dep habarlaıdy QR DSÁDM baspasóz qyzmetinen.
Baspasóz qyzmetiniń habarlaýynsha, konkýrs «SQ-Farmatsııa» JShS aýmaǵynda ótkizildi. Baǵalaý komıssııasynyń quramyna 27 adam - QR Parlamenti Májilisiniń depýtattary, QR Densaýlyq saqtaý jáne áleýmettik damý mınıstrliginiń, QR Investıtsııa jáne damý mınıstrliginiń qyzmetkerleri, Ulttyq kásipkerler palatasynyń, salalyq qaýymdastyqtardyń ókilderi jáne Biryńǵaı dıstrıbıýtordyń qyzmetkerleri kirdi.
Baıqaýǵa memleketpen uzaq jyldardan beri yntymaqtasa jumys istep kele jatqan tájirıbesi mol otandyq farmatsevtıkalyq óndiris salasynyń belgili kásiporyndarymen qatar, Qazaqstandaǵy óndiristik jobalaryn endi bastap jatqan kompanııalar da qatysty. Bul túsinikti de, óıtkeni, uzaq merzimdik kelisimder sheńberinde Biregeı dıstrıbıýtormen arada jasalatyn jeti jyldyq kepildi yntymaqtymaqtastyq jańa perspektıkalyq óndiristerdiń tartymdylyǵyn arttyrady.
Jarııalanǵan nomenklatýradaǵy ataýlar áleýetti ónim jetkizýshiler arasynda upaı sanyn ala otyryp, taratyldy. Teńdeı upaı jınaǵan kompanııalar ishinen jeńimpazy aýktsıon qaǵıdasy boıynsha anyqtaldy, ıaǵnı shartty baǵa jaǵynan kóp shegerim usynǵan áleýetti ónim jetkizýshiniń mereıi ústem boldy. Osylaısha, básekege toly synaq nátıjesinde baǵalaý komıssııasy memlekettik medıtsınalyq qyzmet kórsetetin aýrýhanalar úshin 561 túrli dári-dármek jetkizetin kompanııalardy anyqtaǵanyn aıtady.
Aıta ketetin jaıt, otandyq ónim óndirýshilerdi qoldaý sheńberinde Biregeı dıstrıbıýtordyń satyp alý sharasynda qazaqstandyq farmatsevtıkalyq zaýyttar tenderlik pretsedýralarda basymdyqqa ıe boldy. Otandyq farmatsevtıkalyq salany damytý úshin qolaıly jaǵdaı jasaý jumystary jalǵasyn tabady.
«Salamatty Qazaqstan» josparly memlekettik baǵdarlamasy negizinde dárilik zattardyń qoljetimdiligi men sapasyn arttyrý maqsatynda patsıentterge dárihana men dárilik zatty tańdaý quqyǵyn berý arqyly halyqty ambýlatorııalyq dári-dármekpen qamtamasyz etýdi reformalaý júrgizilip keledi. Bul tetik farmatsevtıka naryǵyndaǵy sýbektilerdiń, onyń ishinde shaǵyn kásipkerlik sýbektileriniń kópshiligin ambýlatorııalyq dári-dármekpen qamtamasyz etýge qatysýǵa tartý jolymen halyqqa dárilik zattardyń naqty qoljetimdiligin jaqsartýǵa múmkindik beredi.
Josparlanyp otyrǵan is-sharalar búkil halyqtyń sapaly dárilik zattarǵa teń qol jetkizýin qamtamasyz etedi, qarjy resýrstaryn utymdy paıdalanýǵa, dárilik zattar baǵasynyń jyl saıynǵy ósýin tómendetedi, tegin medıtsınalyq kómektiń kepildik berilgen kóleminiń sheńberinde satyp alynatyn dárilik zattardyń kólemi men tizbesin keńeıtedi jáne otandyq farmatsevtıka ónerkásibin damytý úshin jaǵdaı jasaıdy.
