Otandyq bıznesmender Aqtóbe oblysyna áleýmettik nysandar salyp berýge ýáde etti

Bıznestiń áleýmettik jaýapkershiligi aıasynda Aqtóbe oblysy ákimdigi men «Rýskaıa mednaıa kompanııa» JAQ, «Voshod-Oriel» JShS kelisimge qol qoıdy, dep habarlaıdy QazAqparat tilshisi.

Aqtóbe oblysynyń ákimdigi, óńirdegi óndiris oryndary men kásipodaq uıymy jyl saıyn úshjaqty kelisimshartqa qol qoıady.

Bul joly Hromtaý aýdanyndaǵy «Rýskaıa mednaıa kompanııa» JAQ holdıngi qurylymyna kiretin  «Aqtóbe mys kompanııasy» jáne «Kopper Tehnolodjı» JShS esep berdi. Ótken jyly mys kenin óndirý men mys kontsentraty óndirisi tómendegen. Soǵan qaramastan kompanııa ujymdyq kelisimshart talaptaryn oryndaǵan. Jumysshylardyń eńbekaqysy 3 paıyzǵa ósti.

Oblys ákimi Berdibek Saparbaev atap ótkendeı, Memleket basshysy el halqyna arnaǵan «Qazaqstannyń úshinshi jańǵyrýy: jahandyq básekege qabilettilik» Joldaýynda jáne jaqynda ǵana ótken Úkimettiń keńeıtilgen májilisinde birqatar tapsyrmalar júktedi.

«Negizgi tapsyrmalardyń biri - barlyq áleýmettik-ekonomıkalyq kórsetkishter 2016 jylǵy deńgeıden tómen bolmaýy tıis. «Aqtóbe mys kompanııasy» - 10 jyl shamasynda jumys istep kele jatqan oblystaǵy eń iri kompanııalardyń biri. Oblystyń áleýmettik-ekonomıkalyq kórsetkishteri kóp jaǵdaıda osyndaı kásiporyndardyń qyzmetine baılanysty, sondyqtan da biz sizderdiń turaqty jumys isteýlerińizge múddelimiz. Jalpy alǵanda, 2016 jyldyń qorytyndysy boıynsha kompanııa keıbir tómendeýlerge qaramastan, alǵa qoıylǵan mindetterdi oryndady»,- dedi ol.

«Aqtóbe mys kompanııasy» JShS bıznestiń áleýmettik jaýapkershiligi aıasynda Hromtaý qalasynda zamanaýı sport keshenin jáne Aqtóbe qalasynda balabaqsha salyp beretin boldy. Al Hromtaýdaǵy «Voshod-Oriel» JShS-nyń qarjysyna aýdan ortalyǵynda Mádenıet úıi boı kóteredi.

Kompanııanyń bas dırektory Serik Ibatovtyń aıtýynsha, 2016 jyly jumysshylardyń eńbekaqysy 10%-ǵa ósken. Alaıda, hrom kenin óndirý men hromdy kontsentrat óndirisi tómendedi.