Otandyq bızneske bilikti mamandar jetispeıdi - Shyńǵysbaeva
TALDYQORǴAN. QazAqparat - Otandyq bızneske bilikti mamandar jetispeıdi. Búgin Taldyqorǵanda ótken «Bilim.Bıznes.Kásip» І halyqaralyq forýmynda jýrnalısterge suhbat bergen Lázzat Shyńǵysbaeva osyndaı pikirin bildirdi, dep habarlaıdy QazAqparat tilshisi.
Almaty oblystyq kásipkerler palatasynyń dırektory L.Shyńǵysbaevanyń aıtýynsha, kolledjderden bilim alǵan jastardyń basym bóligi jumyssyz júr. Óıtkeni olarǵa suranys joq. Al kásipkerlerge bolsa zamanaýı tehnıkanyń tilin biletin mamandar qajet. Osyndaı ózekti máseleniń oń sheshimin tabý maqsatynda aýqymdy forým uıymdastyryldy. Oblystyq kásipkerler palatasy men bilim basqarmasy birlese ótkizgen sharaǵa shetelden arnaıy bilikti mamandar shaqyrtyldy. Máselen, Germanııadan kelgen Trır qalasyndaǵy kásiptik palatanyń úılestirýshisi Albert Over dýaldi bilim berý júıesinde jınaqtaǵan tájirıbesimen bólisýge ázir ekenin jetkizdi. Al kásipkerler kolledjderdiń tehnıkalyq bazasynyń basym bóligi zaman talabyna saı emes dep otyr. Sondaı-aq stýdentterdiń bilimi teorııa jaǵynan jaqsy bolǵanmen, praktıka júzinde álsiz ekenin aıtýda. Jalpy Almaty oblysyna ásirese týrızm, farmatseftıka, medıtsına syndy salalaryna kadrlar qajet. Óńir boıynsha 73 kolledj bar. Onda 32 myńnan astam stýdent 68 mamandyq boıynsha daıyndalyp shyǵady.
