Otandyq balyq jəne balyq ónimderi naryǵy eki ese artýy múmkin
«Otandyq balyq jəne balyq ónimderi naryǵy kólemin 66 myń tonnadan 120 myń tonnaǵa; balyq aýlaýdy 45 myń tonnadan 60 myń tonnaǵa deıin Kaspıı teńizi resýrstaryn ıgerý esebinen; balyq ósirýdi 7-den 60 myń tonnaǵa deıin arttyrýǵa bolady», - dedi Maǵzum Myrzaǵalıev Atyraý qalasynda ótip jatqan Qazaqstannyń balyq sharýashylyǵyn damytý jónindegi keńeste.
Onyń atap ótýinshe, bul Qytaı men Reseı syndy əlemdik naryqtaǵy eksport kólemin kóbeıtýge múmkindik beredi. Osy maqsatqa qol jetkizý úshin salada birqatar sharalar iske asyrylady. Atap aıtqanda, balyq aýlaý kezeńin uzartý josparlanýda.
«Bizdiń balyqshylar Kaspıı teńizinde reseılik əriptesterine qaraǵanda kəsipshilikti 11 kúnge kem atqaratyndyqtan aýlaý merzimi ulǵaıtylady. Budan basqa, Jaıyq ózenindegi balyq aýlaý merzimi 15 mamyrǵa deıin uzartylady. Tıisti buıryq jaqyn arada qabyldanady», - dedi Ekologııa mınıstri .
M.Myrzaǵalıevtiń aıtýynsha, bul sharalar balyq aýlaý kólemin kóktemde 7 myń tonnadan 10 myń tonnaǵa deıin arttyrýǵa múmkindik beredi.
Sondaı-aq, aýmaqtyq ınspektsııalarǵa balyq aýlaý merzimin aýa raıyna baılanysty aýystyrý týraly jedel sheshim qabyldaý quqyǵyn berý oılastyrylýda. Bul norma Parlament Məjilisiniń qaraýyndaǵy «Týrıstik qyzmet týraly» zań jobasyna engizilgen. Balyq resýrstaryn paıdalaný aqysyn qaıta qaraý məselesi de qosymsha zerdeleýdi talap etedi.
«Məselen, kókserkeniń bir kelisi úshin bizde bıznes 35 teńge, al Reseı 6 teńge tóleıdi. Bul problemalardy ońtaıly sheshý bızneske zor kómek bolar edi», - dedi M. Myrzaǵalıev.
Ekologııa mınıstrligi basshysy sonymen qatar, RF sekildi túngi ýaqytta balyq aýlaýǵa ruqsat berý, sondaı-aq balyqshylar «Aqjaıyq» tabıǵı rezervatynan ótý kezinde tóleıtin aqyny alyp tastaý múmkindigin qarastyrýdy usyndy. Qazirgi ýaqytta tərtip boıynsha bir adamǵa ótý aqysy bir kúnge 265 teńgeni quraıdy.
Mınıstr balyq ósirý salasynda ósý qarqyny baıqalatyndyǵyn aıtty. Məselen, sońǵy 7 jylda ósirilgen balyq kólemi 9 ese, 800 tonnadan 7 myń tonnaǵa deıin artqan.
«Balyq ósirýge qyzyǵýshylyqty arttyrý úshin birqatar sharalar kózdelýde. Balyq aýlaý sharýashylyǵyn ózenderdegi sý qorǵaý aımaǵyna ornalastyrýǵa ruqsat berý kerek. Mundaı təjirıbe kórshiles Ózbekstan men Qyrǵyzstan elderinde bar. Odan soń, balyq ósirýde sý resýrstaryn paıdalaný aqysyn esepteý mehanızmin ózgertý qajet. Sebebi, sýlandyrýǵa qaraǵanda, barlyq derlik sý qaıta qaıtarylady ǵoı. Sondyqtan býlaný jəne súzilý boıynsha ǵana aqy tólenýi tıis», - dedi mınıstr.
