Otandyq aralas jekpe-jek sportshylary halyqaralyq arenada ózderiniń deńgeıin nyǵaıtty
ASTANA. QazAqparat - Ulttyq quramanyń jetistikteri Qazaqstanda aralas jekpe-jektiń damý deńgeıiniń óskenin kórsetip otyr. Bul týraly búgin Ortalyq kommýnıkatsııalar qyzmetindegi baspasóz máslıhatynda Qazaqstannyń MMA Federatsııasynyń prezıdenti Anatolıı Kım málim etti.
Onyń sózine qaraǵanda, bıylǵy jyldyń barysynda Federatsııanyń jetekshiligimen áýesqoılar men kásipqoılar arasynda iri respýblıkalyq jáne xalyqaralyq jarystar ótkizildi. Atap aıtqanda, bundaı dodalardyń arasynda 9-11 sáýirde Oral qalasyndaǵy III Qazaqstan chempıonaty men 17-19 qyrkúıekte Aqtóbede ótken II MMA Kýbogyn atap ótken jón. Jarysqa barlyq aımaqtardan 200-den astam sportshylar qatysyp, Qazaqstannyń MMA quramasy jańa sportshylarmen tolyqty.
Sonymen qatar A. Kım aǵymdaǵy jyly Azııa chempıonaty Tájikstannyń Hýdjand qalasynda ótkenin aıta kele, osy jarysta Qazaqstan jalpy komandalyq esepte birinshi oryn ıe bolyp, qurama tórt altyn, bir kúmis, bir qola enshilegenin eske salyp ótti.
MMA Federatsııasynyń prezıdenti qazirgi kezde qazaqstandyq sportshylar barsha álemge tanylǵanyn, osy oraıda Qazaqstan sportshylarymen jekpe-jekke shyqqan kezde daıar bolýy úshin shet eldik qarsylastar qazaqstandyqtardyń tehnıkasyn zerdeleýde ekenin atap kórsetti.
