Otandyq «Ańshy bala» fılmi Gollıvýdtyq festıvalda júldege ıe boldy
ASTANA. 30 naýryz. QazAqparat - Sh. Aımanov atyndaǵy «Qazaqfılm» kınostýdııasy túsirgen «Ańshy bala» fılmi Gollıvýdta ótken International Family Film Festival halyqaralyq baıqaýynda
«Úzdik sheteldik drama» syılyǵyn ıelendi, dep habarlaıdy «Qazaqfılm» AQ-nyń baspasóz qyzmeti.
Festıval 21-25 naýryz kúnderi Raleigh Studios-ta ótti.
Atalmysh týyndynyń rejısseri Erlan Nurmuhambetov 2011 jyly qyrkúıekte ótken VII halyqaralyq «Eýrazııa» festıvalinde jeńimpaz atanǵan bolatyn. Biraq ol kezde oǵan «Naızaǵaı aldynda» fılmi jemis ákelgen edi.
«Ańshy bala» kınosynyń jelisi qalada týyp-ósken balanyń tóńireginde órbıdi. Ol jazǵy demalysta atasyna aýylǵa kelip, ózine úırenshikti emes dalanyń ómirine tap bolady. Kartına qalyń jurtshylyqtyń nazaryna maýsym aıynda usynylady.
