Otandyq anımatsııa óndirisi jańa kınostýdııamen tolyqty
NUR-SULTAN. QazAqparat – Búgin elordada anımatsııalyq ónimder jasaýmen aınalysatyn «QuantFilm» kınostýdııasy ashyldy, dep habarlaıdy QazAqparat tilshisi.
Kınostýdııa mamany Talas Orazbaıulynyń aıtýynsha, jastardan quralǵan shyǵarmashylyq ujym qazaq anımatsııasyna óz úlesin qosyp, balalardy jańa fılmdermen qýantpaq. Sonymen birge, jasóspirimderge qazaqtyń ádet-ǵurpyn dáripteý arqyly olardy ultjandy, elin-jerin súıetin otanshyl etip tárbıeleýge atsalysýdy kózdeıdi.
«Mýltfılm – elimizdiń erteńi, bolashaq urpaqty tárbıeleıtin mańyzdy qural. Óz ultyn, óz tilin súıetin otanshyl urpaq - ana tilindegi fılmder kórý arqyly qalyptasady. Sol úshin de bul salany damytýdyń mańyzdylyǵy zor. Ujymda ázirge anımatsııa janrynda kásibı sheber retinde shyńdalǵan 15 maman jumys jasaıdy. Barlyǵy on jyldan astam osy sala tendentsııalaryn úzdiksiz zerttep, úırengen mamandar. Sondyqtan «QuantFilm» kınostýdııasy tehnıkalyq múmkindikteriniń joǵarylyǵymen erekshelenedi. Stýdııanyń bazalyq kýrs ashyp, maman sanyn arttyrýǵa múmkindigi mol. Kreatıvti ıdeıasyn jetildirgisi keletin jastarǵa anımatsııanyń qyr-syryn úıretýdi de josparlap otyrmyz», - deıdi ol.
Aıta keteıik, Talas Orazbaıuly buǵan deıin «Anyz film» kıno stýdııasynda qyqmet atqaryp, kóptegen anımatsııalyq jobalarǵa atsalysty. Talastyń tehnıkalyq jetekshilik etýimen jasalǵan «Yrysty ydystar» atty jańa anımatsııa 2020 jyly Amen Animation halyqaralyq kınofestıvaliniń «Úzdik mýlthıkaıa» nomınatsııasynyń jeńimpazy atandy.
