Otandyq 3 munaı óńdeý zaýytyn jańartýǵa 4 mlrd. dollardan astam ınvestıtsııa jumsalady - Á. Maǵaýov

ALMATY. 24 naýryz. QazAqparat /Erlik Erjanuly/ - Elimizdegi 3 munaı óńdeý zaýytyn jańartýǵa 4 mlrd. dollardan astam ınvestıtsııa jumsalady. Bul týraly búgin Almatyda ótip jatqan 6-shy Halyqaralyq munaı óńdeý, munaı hımııasy jáne munaı ónimderiniń «KazRefinEx-2011» sımpozıýmynda QR Munaı jáne gaz vıtse-mınıstri Áset Maǵaýov aıtty.

«Atyraý munaı óńdeý zaýytynda 2,6 mıllıard dollardyń 3 jobasy júzege asyrylyp jatyr. Birinshisi, ELOÝ-AVT vakýýmdyq blogynyń qýatyn arttyrýǵa arnalǵan. Oǵan 300 mıllıon dollardyń ınvestıtsııasy jumsalady. Ekinshisi, 1,2 mıllıard dollardyń benzol men aramotıkalyq kómirsýtekter óndirý kesheniniń qurylysy jobasy. Úshinshisi, 1,1 mıllıard dollarǵa baǵalanatyn munaıdy tereń óńdeý kesheni qurylysy jobasy. Al Shymkent pen Pavlodardaǵy munaı óńdeý zaýyttaryndaǵy qaıta qurý jobalarynyń tehnıkalyq negizdemeleri jasalýda», - deıdi Áset Maǵaýov.

Onyń aıtýynsha, Pavlodar munaı óńdeý zaýytyna 1,2 mıllıard, Shymkent munaı óńdeý zaýytyna 1 mıllıardqa jýyq dollardyń ınvestıtsııasy tartylmaq. Qazirgi kezde Pavlodar munaı óńdeý zaýytynyń tehnıkalyq negizdemesin jasaý aıaqtalýdyń aldynda tursa, Shymkent munaı óńdeý zaýytynda júrgizilgen eki tehnıkalyq negizdemege taldaý jasalýda. Bul taldaýda 2 tehnologııanyń biri tańdap alynatyn bolady.