Otandyq júk tasymaldaýshylardy shet memleketterge jóneltýde qandaı másele bar
ALMATY. KAZINFORM – Almatyda halyqaralyq avtokólik júk tasymaly máseleleri boıynsha keńeıtilgen keńes otyrysy ótti.
QR Kólik QR Kólik mınıstrliginiń Avtomobıl kóligi jáne kóliktik baqylaý komıtetiniń tóraǵasy Álı Altaıdyń aıtýynsha, otandyq kólik-logıstıkalyq bıznes ókilderimen Almatyda ekinshi ret kezdesý ótip otyr.
«Buǵan deıin Almatydaǵy alǵashqy kezdesýde halyqaralyq avtokólik júk tasymalyn júzege asyrý kezinde otandyq tasymaldaýshylarǵa shet memleketterge kirýge múmkindik beretin ruqsat blankilerin bólý júıesin reformalaýdy usynǵan edik. Sebebi, bul baǵytta birqatar máseleni kórip otyrmyz. Bul jerde sybaılas jemqorlyqtyń da táýekeli baıqalady. Jalpy, júıeni áli jetildire túsý qajet. Sol sebepti jańa júıeni usynyp otyrmyz. Ol boıynsha naqty júk tasymaldaıtyn azamatqa sheteldik blankini beretin bolamyz, keıin ol azamat barǵan sol sheteldiń aýmaǵynan 30 kún ishinde shyǵyp ketýi tıis. Biz onyń barlyǵyn «Búrkit» erekshe arnaıy maqsattaǵy jasaqpen birge qadaǵalaıtyn bolamyz. Sol arqyly búkil blankilerdiń naqty statıstıkasyn bilemiz. Sondaı-aq naryqtaǵy barlyq tasymaldaýshyny bir deńgeıge keltiremiz. Aldaǵy ýaqytta jańadan qurylǵan nemese burynnan bar tasymaldaýshy kompanııalarǵa da teń dárejede jaǵdaı jasaıtyn bolamyz», - dedi Álı Altaı.
Onyń aıtýynsha atalmysh blankter memleket aralyq kelisimshartpen júzege asatyn qujat sanalady.
«Bizde álemniń 42 memleketimen jasasqan sondaı kelisimshart bar, sonyń nátıjesinde jyl basynda biz ár memleketpen parıtettik mólsherde blankilermen almasyp otyramyz. Bolashaqta kez kelgen tasymaldaýshy jańa júıe arqyly blankini ala otyryp, qalaǵan jaǵyna bara alatyndaı jaǵdaı jasaýymyz kerek. Blankini alý máselesi boıynsha júıeni áli ońtaılandyrý kerek. Búgingi kezdesýde biz eshqandaı máseleni jasyrmaı, ortaǵa salyp otyrmyz. Josparǵa sáıkes, bıylǵy jyldyń ortasynda jańa júıeni iske qosqaly otyrmyz. Oǵan deıin tasymaldaýshylardyń barlyq usynys-talaptary eskeriledi. Bul rette memleket pen kásipkerlerdiń múddeleri jan-jaqty qarastyryla otyryp, eń bastysy barlyq jumystar zań aıasynda iske asýy kerek», - dep atap ótti QR Kólik QR Kólik mınıstrliginiń Avtomobıl kóligi jáne kóliktik baqylaý komıtetiniń tóraǵasy Álı Altaı.
