Otandyq júk tasymaldaýshylar úsh elge ruqsatty onlaın rásimdeı alady
ASTANA. KAZINFORM — Qazaqstandyq tasymaldaýshylar endi Ázerbaıjan, Túrkııa jáne Qyrǵyzstan aýmaǵynda halyqaralyq avtomobıl tasymaldaryn júzege asyrý úshin elektrondyq sheteldik ruqsat blankilerin onlaın rásimdeı alady, dep habarlaıdy egov.kz.
elicense.kz portalynda sheteldik ruqsat blankilerin alýǵa bolatyn baǵyttar tizimi keńeıtildi. Qazaqstandyq júk tasymaldaýshylar endi Ázerbaıjan, Túrkııa jáne Qyrǵyzstan aýmaǵyna kirýge arnalǵan elektrondyq ruqsattardy onlaın rásimdeı alady.
Sheteldik ruqsat blankisi (ShRB) — qazaqstandyq tasymaldaýshyǵa belgili bir shet memlekettiń aýmaǵynda júk tasymaldaýǵa quqyq beretin qujat. Mundaı ruqsattar memleketter arasynda ekijaqty negizde almasylady.
Qyzmetti Qazaqstan Respýblıkasynda tirkelgen jáne halyqaralyq avtomobıl tasymaldaryna ruqsaty bar kólik quraldaryna ıe zańdy tulǵalar men jeke kásipkerler paıdalana alady.
Ruqsat alý úshin elicense.kz portalynda avtorızatsııadan ótip, «Kólik» bólimine kirý kerek. Odan keıin «Halyqaralyq qatynasta jolaýshylardy jáne bagajdy avtomobılmen tasymaldaýdy turaqty júzege asyratyn Qazaqstan Respýblıkasynyń tasymaldaýshylaryna shet memlekettiń aýmaǵyna (aýmaǵynan) kirýge (ketýge) ruqsat berý» qyzmetin tańdap, uıym men kólik quraly týraly derekterdi toltyryp, baǵytty jáne blank sanyn kórsetip, memlekettik bajdy tólep, ótinimge qol qoıý qajet.
— Qyzmet kórsetý merzimi — 2 jumys kúni. Daıyn ruqsat elicense.kz portalyndaǵy Jeke kabınetke jiberiledi. Blanktiń jaramdylyq merzimi — 30 kún. Qyzmet quny — bir blank úshin 1 AEK, — delingen habarlamada.
Budan buryn Transkaspıı dálizi arqyly júk tasymaly 3,5 ese óskenin jazǵanbyz.
