Otandyq jylqy tuqymyn saqtaý jáne kóbeıtýge 701 mıllıon teńge bólinedi
ASTANA. KAZINFORM – Senat «Qazaqstan Respýblıkasynyń keıbir zańnamalyq aktilerine minis jáne minis-jegin jylqylardyń otandyq tuqymdaryn saqtaý jáne ósimin molaıtý máseleleri boıynsha ózgerister men tolyqtyrý engizý týraly» zańdy maquldady.
«Zańnyń negizgi maqsaty – otandyq jylqy tuqymynyń tektik qoryn saqtaý, sondaı-aq onyń asyl tuqymdyq qasıetterin jaqsartý, mal basyn ulǵaıtý úshin selektsııalyq jáne asyldandyrý jumysyn júrgizý. Osy maqsatty iske asyrý úshin zańda «asyl tuqymdy janýar» jáne «tuqym standarty» uǵymdaryna ózgerister engiziledi. Bul rette asyl tuqymdy maldardyń fenotıptik jáne ónimdilik kórsetkishtermen qatar, jylqylardyń jumysqa qabilettiligi, eptiligi, tózimdiligi sııaqty qasıetteri tuqym standartyna jatqyzylady. Atalǵan zańmen «Asyl tuqymdy mal sharýashylyǵy týraly» jáne «Selektsııalyq jetistikterdi qorǵaý týraly» zańdarǵa túzetýler engiziledi», - dedi senator Ernur Áıtkenov.
Onyń atap ótýinshe, zańnamalyq túzetýlerde otandyq jylqy tuqymyn saqtaý jáne kóbeıtý maqsatynda kelesideı sýbsıdııalaý kózdelgen:
- otandyq minis-jegin jylqylaryn ósiretin ortalyqtarǵa sheteldik selektsııanyń sporttyq baǵytyndaǵy asyl tuqymdy aıǵyrlaryn satyp alýǵa;
- asyl tuqymdy analyq mal basymen selektsııalyq-asyl tuqymdyq jumys júrgizýge;
- olardy ustaý boıynsha shyǵyndardy óteýge.
«Memleket tarapynan bólinetin sýbsıdııanyń jalpy somasy – 701 mıllıon teńge. Bul qarajat aldaǵy 5 jylǵa jyl saıyn 140 mıllıon teńgeden beriletin bolady. Kórsetiletin memlekettik qoldaý sharalary asyl tuqymdy jylqylardyń gendik qoryn saqtaýǵa, damytýǵa jáne qalpyna keltirýge, otandyq jylqy sharýashylyǵyn jetildirýge yqpal etedi dep senemin. Bul zań elimizde ulttyq at sporty túrlerin damytýǵa, qazaq halqynyń mádenıetin, dástúrleri men ómir saltyn nasıhattaıtýǵa septigin tıgizedi. Zańdy qabyldaý otandyq asyl tuqymdy jylqylardy ósirý úshin memlekettik qoldaýdy alýǵa, minis-jegin qazaqy jylqylardyń sanyn kóbeıtýge jáne olardyń sporttyq qasıetterin jaqsartýǵa múmkindik beredi», - dedi senator.
