Otandyq jeńil ónerkásipke memlekettik satyp alýda basymdyq berilmek
ASTANA. KAZINFORM — Úkimet jeńil ónerkásipti qoldaý men damytýdyń jedel jáne júıeli sharalaryn ázirledi.
Vedomstvonyń baspasóz qyzmeti málim etkendeı, memlekettik satyp alý otandyq jeńil ónerkásip kásiporyndary úshin qoljetimdi bolady, qazaqstandyq shıkizatty paıdalanýǵa qoıylatyn talaptardy arttyrý, al mektep formasynyń sapasyna qoıylatyn talaptardy ulttyq standarttar deńgeıinde bekitý josparlanyp otyr. Sonymen qatar ónimdi sertıfıkattaý jáne zerthanalyq synaý úshin bıznes shyǵyndaryn azaıtý usynylady.
Úkimette Premer-mınıstrdiń orynbasary — ulttyq ekonomıka mınıstri Serik Jumanǵarınniń tóraǵalyǵymen ótken jeńil ónerkásip ókilderimen kezekti kezdesýde jeńil ónerkásipti qoldaý jáne damytý boıynsha qosymsha sheshimder paketi usynyldy. Ol tamyz aıynyń basynda vıtse-premermen kezdesýde aıtylǵan otandyq óndirýshilerdiń usynystaryn eskere otyryp daıyndaldy.
— Negizgi sheshimderdiń biri — memlekettik qorǵanys tapsyrysyna qatysty. Jeńil ónerkásip taýarlaryn satyp alý kezinde shıkizattyń elishilik qundylyǵyna qoıylatyn talaptardy kezeń-kezeńimen arttyrý usynylady. Bul qazaqstandyq shıkizatty paıdalanýdy ulǵaıtýǵa jáne jergilikti óndirýshilerdiń neǵurlym turaqty júktemesin qamtamasyz etýge múmkindik beredi, — delingen habarlamada.
Memlekettik satyp alýda otandyq kásiporyndardyń múmkindikterin keńeıtý josparlanǵan. Ol úshin «Eńbek» RMK qylmystyq-atqarý júıesi arqyly bir kózden satyp alynatyn jeńil ónerkásip taýarlarynyń tizbesin qaıta qaraý usynylady. Tizimde otandyq kásiporyndarǵa memlekettik satyp alýǵa neǵurlym keń qoljetimdilikti ashyp, uıymnyń ishki qajettilikteri úshin ǵana ónim qaldyrý usynylady.
Ózgerister mektep formasyna da áser etedi. Onyń sapasyna qoıylatyn talaptardy Ulttyq standarttarǵa sáıkestikti normatıvtik turǵydan bekitý arqyly kúsheıtý usynylady.
Sertıfıkattaý jáne zerthanalyq synaqtardyń quny da qarastyryldy. Ótken keńeste bıznes ókilderi memlekettik satyp alýǵa qatysý úshin ónimdi sertıfıkattaýdyń joǵary qunyn atap ótti. Salanyń usynystaryn eskere otyryp, ónimdi synaýǵa belgilengen tarıfterdi kózdeıtin ádistemeni ázirleý týraly sheshim qabyldandy. Bul qyzmetterdiń qunyn ashyq etip, óndirýshilerdiń shyǵyndaryn tómendetýi kerek.
Jedel sharalardy zańǵa táýeldi aktiler deńgeıinde, júıeli sharalardy zańnamaǵa ózgerister engizý arqyly iske asyrý josparlanyp otyr.
Sonymen qatar, jeńil ónerkásipti damytý jónindegi keshendi jospar sheńberinde Salyq kodeksine jáne basqa da zańnamalyq aktilerge túzetýler paketi daıyndaldy.
Negizgi quraldardyń biri — lokalızatsııany jaqsartý týraly kelisim jasaý. Ózine tıisti mindettemelerdi qabyldaǵan kásiporyndar salyq jeńildikterine, onyń ishinde obektilerdiń ornalasqan jerine qaramastan, eksterrıtorııalylyq týraly norma esebinen quqyq alady.
Buǵan deıin jeńil ónerkásipti damytýǵa arnalǵan 28 shara iske asyrylatyny aıtyldy.
