Otandyq jeńil ónerkásip óndirisi kólemi 2,6 paıyzǵa ósti

ASTANA. KAZINFORM — Memlekettik qoldaý alǵan sýbektiler saýda oryndarynyń keminde 20% azyq-túlikke jatpaıtyn otanda óndirilgen taýarlarǵa arnaýǵa mindetti. Bul týraly Saýda jáne ıntegratsııa vıtse-mınıstri Áset Núsipov málim etti. 

— Jyl basynan beri jeńil ónerkásip salasyndaǵy óndiris kólemi 2,6%-ǵa ósti. Bul jaı ǵana san emes, júıeli jumystyń, ınvestıtsııa, kooperatsııa men mamandardyń zor eńbeginiń nátıjesi. Jeńil ónerkásip saýda salasymen tyǵyz baılanysty, al qazirgi jaǵdaıda ishki naryqtyń, turaqty tutynýdyń jáne ımportty almastyrýdyń róli artyp jatyr. Bizdiń mindet — otandyq óndiristi qoldaý, ishki jáne syrtqy ótkizý naryǵyn damytý jáne qazaqstandyq ónimderge arnalǵan sóre keńistigin ulǵaıtý, — dedi Áset Núsipov elordada ótken jeńil ónerkásip ulttyq birlestiginiń 10 jyldyǵyna arnalǵan ІІ sezinde.

Vıtse-mınıstrdiń málimdeýinshe, otandyq óndiristi qoldaý maqsatynda birqatar sheshim qabyldandy.

— Búginde memlekettik qoldaý alǵan sýbektiler saýda oryndarynyń keminde 20% azyq-túlikke jatpaıtyn elde óndirilgen taýarlarǵa arnaýy tıis. Bul sala múddesi úshin qabyldanǵan prıntsıpti sheshim, — deıdi ol.

Búgin elordada Qazaqstannyń jeńil ónerkásip ulttyq birlestiginiń 10 jyldyǵyna oraı sezd ótti.

Buǵan deıin habarlaǵanymyzdaı elimizde jeńil ónerkásipti damytýdyń keshendi jospary ázirlenip jatyr. 

Aıta keteıik, búginde otandyq jeńil ónerkásip salasynda shamamen 28 myń adam eńbek etedi, olardyń shamamen 60% — áıel mamandar.